遊人偷步遊覽 大東山限定芒草靚景
2016/10/31 10:41:04 網誌分類: 生活
| 迎接十一月深秋，近日氣溫稍跌，加上風和日麗，係登高遠足嘅好時節！行山朋友同Kelly講，遍佈芒草嘅大東山準備換上金色新衫迎人，有遊人偷步前去遊覽，漫山芒草隨風擺動，非常壯觀。另一邊廂，有朋友去屯門菠蘿山小峽谷遠眺翠綠山巒，同樣美不勝收。 十月最後一個周末剛過去，仲有唔夠一星期就係立冬，唔少人把握呢個秋冬之間嘅時間去行山睇靚景。話說位於大嶼山嘅大東山，以芒草聞名，近日芒草準備轉季變成金黃色，觀賞指數急升。 喺facebook群組「香港初級行山之友」，有發燒友貼上靚相，見到芒草漸漸變色，大片大片隨風擺動，雖然部份尚未變色，但勝在遊人唔太多，景靚又可以遠離煩囂，不過大東山有成八百六十幾米，加上唔少石級，大家唞足精神去會較好。 屯門小峽谷睇山巒 如果想輕鬆遠足，又對山景情有獨鍾，小妹提議大家去屯門菠蘿山遊覽小峽谷，有網友噚日貼出靚相，小妹見到藍天白雲襯托翠綠山巒，好有層次，心曠神怡，秋天話咁快去到尾聲，想把握涼爽天氣去玩就快快行動啦。 KellyChu |
 | |
| |
 | |
|
回應 (0)
我要發表