彩虹站路軌直駛鬼門關? 港鐵萬聖節講「鬼故」

2016/11/01 08:41:04 網誌分類: 生活

01 Nov

        港鐵鐵路一直有唔少鬼怪傳聞，好似一直流傳有三條路軌嘅彩虹站，中間條唔用嘅路軌係直駛去鬼門關，搞到Kelly都心慌慌。適逢萬聖節，港鐵就自行拍片粉碎呢個謠傳，原來彩虹站中間條路軌係直接通去九龍灣車廠㗎。有心水清嘅網友就話：「真係『鬼』」唔知咩！」

        港鐵前晚響facebook專頁到話：「大家有無聽過或者諗過彩虹站月台中間嗰條路軌係去邊嘅呢？有人話……佢係通往……」仲落埋「#細膽者慎入」、「#行慢鏡」嘅Hashtag，又大賣關子叫人Mark實佢哋個Page。個Post一出，即刻引嚟唔少網民留言，仲重提過往流傳嘅鬼故，話係通向鬼門關咁話。

        港鐵就趁昨日萬聖節先揭曉答案，原來中間條路軌係通往九龍灣車廠㗎。港鐵解釋因為一般列車出入車廠、或有車務調配先會用到呢個月台，仲話呢段短片係適逢有列車要返廠「洗白白」，先拍到片嚟同大家Share呢個千載難逢嘅畫面喎，真係笑死Kelly呀。

        澄清只係駛去九龍灣

        有網民就好醒咁話：「『鬼』唔知呢條路軌係畀車返廠咩」；有鐵路迷就要求港鐵：「拍多啲呢啲車頭片啦，大家都好有興趣，因為平時唔可以好似巴士咁睇到前面。」

        KellyChu