姚松炎的強盜邏輯

套用姚松炎嘅邏輯，如果議員或者前議員可以聲稱提供專業顧問服務而向立法會追討，咁議員如果喺議會內「拉布」，拖延民生工程「上馬」以致成本上升，係咪政府又可以向啲議員追討成本先？..如果向啲「拉布」議員追討番損失，真係唔知條數要點計喇！ 

2017-07-28

四個前立法會議員因為宣誓失效被法庭判決失去議員資格（下稱「DQ」），今日就係四人交還立法會辦公室嘅最後期限；其中一個被DQ嘅姚松炎噚日接受訪問嘅時候，就話如果立法會向佢追討薪津，佢會考慮反向立法會索取顧問費，金額大約係三百萬元。一聽到佢咁講，第一個反應就係佢嘅諗法同「搶」有咩分別呢？乜有人可以單方面聲稱自己係顧問，然後問人攞幾百萬元咁惡？ 

自稱顧問的「顧問費」

如果根據法院DQ梁頌恆、游蕙禎嘅Case，姚松炎等人都好難逃避被追討薪津嘅責任，不過姚松炎嘅想法比較「超前」，竟然話自己如果畀立法會追討薪津，會考慮以合約法中「按勞計酬」嘅形式，透過民事訴訟，向立法會追討呢九個月所提供專業顧問服務。一聽到姚松炎咁講，真係即刻嚇一跳，乜世間上可以有人自稱係專業顧問，然後收人幾百萬顧問費咁誇張？而且佢自己宣誓失效無履行合約在先，又憑甚麼收「顧問費」呢？ 

再者，如果姚松炎自稱顧問可以收咁多錢，咁以後立法會仲成世界，會唔會有其他無被DQ嘅議員同立法會講自己又係專業人士，要向立法會額外收取顧問費呢？又或者之後再有被DQ議員同樣話自己係向立法會提供專業顧問服務，然後又要收立法會顧問費？舉個簡單例子，如果有個做咗兩年議員嘅資深大律師被DQ，咁佢咪分分鐘要收番立法會幾千萬甚至成億元？如果要用一個字概括姚松炎嘅言行，就係一個「搶」字！

工程受阻 可向議員追討嗎？

套用姚松炎嘅邏輯，如果議員或者前議員可以聲稱提供專業顧問服務而向立法會追討，咁議員如果喺議會內「拉布」，拖延民生工程「上馬」以致成本上升，係咪政府又可以向啲議員追討成本先？今屆立法會喺非建制派瘋狂「拉布」之下，好多重要工程好似東涌新市鎮擴展、興建骨灰安置所、中九龍幹線主要工程等等都未批出，如果向啲「拉布」議員追討番損失，真係唔知條數要點計喇！

姚松炎等人最後會唔會畀立法會追討欠薪，或者追幾多都係未知之數，但廣男必須要喺度指出，佢哋今日落得如斯田地，並唔係有任何人要迫害佢哋，而係佢哋係要喺宣誓時「玩嘢」挑戰法律，先會有今日被DQ嘅惡果，可以話咎由自取！

   原圖：stheadline

   姚松炎的強盜邏輯

  http://speakout.hk/index.php/2013-11-04-09-33-03/2013-12-21-07-12-13/24548-2017-07-28-07-45-21