主席惡頂劈炮工黨臭氣熏天

2017/08/24 12:30:01 網誌分類: 議員政棍

24 Aug

講起就諷刺，工黨以「民主、公義、團結」做口號，其實最唔民主最唔公義最唔團結就係佢哋，逼走主席只係內部傾軋，唯恐天下不亂、搞衰香港先至最大鑊，不過家陣法律大網愈收愈緊，一眾洋奴漢奸落鑊爭在遲早嘅咋。照咁講，胡女士辭職退黨，劃清界線，確係明智之舉！ ${#icono0_2}$

主席惡頂劈炮工黨臭氣熏天

未入正題前，先同大家講個「馬桶理論」，意思即係馬桶冚埋個蓋，睇落好似蓋好乾淨，其實入面藏污納垢，一旦打開咯喎，即刻臭味四溢，中人欲嘔，呢，用嚟形容反對派就貼切不過嘞。

嗱，眼下又有一個現成例子喇。話說工黨主席胡穗珊尋日失驚無神宣布辭任黨主席兼退黨，嚇咗外界一跳，玩到咁大，並唔係佢有咩好路數，而係睇唔過眼黨內「有人處事及對自己不公」，認為黨內架構已無法公平公正處理黨務，不斷做出令佢無法接受嘅決定，屢勸無效之後，決定退黨抗議喎，黨內有幾多是非，家陣睇到喇。 ${#icono0_34}$ ${#icono0_35}$

即係咁，胡穗珊兩年前先至接過熱火棒，頂替黑金醜聞纏身嘅李卓人出任工黨主席一職，去年參選立法會地區選舉，諗住上位有望，點知黨內選情告急，但奇怪嘅係，佢哋唔係棄卒保帥，而係「棄帥保卒」，為咗集中資源畀李卓人、何秀蘭參選，胡主席「主動」退選。最惡頂係，胡主席犧牲咁大，得唔到尊重不特止，仲反而畀人逼走。好嘞，雖然胡女士好厚道，冇指名道姓批評「有人」即係邊個，但點講都好，胡女士作出咁嚴重嘅指控，證明工黨內部烏煙瘴氣，前主席李卓人難辭其咎。 ${#icono0_9}$

係人都知，李卓人雖然已經被選民唾棄，但一直不甘寂寞，退而不休，喺反中亂港嘅大業上從不缺席。淨係講最近「雙學三子」鋃鐺入獄呢筆吖，法庭都仲未有判決結果啫，佢已經急不及待喺社交網站貼出美國國會議員嘅威嚇聲明，自揭勾結外部勢力、狐假虎威向港府施壓嘅底牌。仲有喎，前陣子白鴿黨鬧出「強力部門」擄人鬧劇，佢老哥明明唔係白鴿黨員，一樣大模廝樣傍實主角出場，慌死冇人知佢有份玩抹黑咁款。你話嘞，有人使橫手架空主席扮太上皇，真係一啲都唔出奇o架，唔想做傀儡咯喎，咪惟有出走一途囉。 ${#icono0_8}$