樂高大師砌全球最大模型郵輪！

2017/11/16 10:11:08 網誌分類: 生活

16 Nov

        第一艘喺香港命名嘅郵輪「世界夢號」聽日將舉行命名儀式，正式啟航，為咗紀念呢個歷史性時刻，星夢郵輪特別搵嚟樂高（Lego）專業認證大師洪子健同佢嘅團隊，用「世界夢號」做藍本，打造咗一艘全球最大嘅Lego模型船，仲打破健力士世界紀錄！

        呢艘Lego模型船以「世界夢號」為藍本，以一比四十比例，用超過二百五十萬件樂高積木砌成，長八點四四米、寬一點三三米、高一點五三米，重二點八噸，好有份量！模型船船頭兩側有嫦娥同太空人嘅馬賽克圖案，真係好靚呀！

        洪子健同Kelly講，砌呢艘模型船最困難係為咗配合健力士世界紀錄要求，唔可以用任何膠水或化學物質將積木連埋一齊，佢哋最後以中國古代建築智慧，用「榫接」嘅方法去將積木連接。如果大家想一睹呢艘「巨輪」嘅真身，本周日起可以去啟德郵輪候船大堂免費參觀。

        KellyChu