認住幾條「廢柴」！

政情：本土勢鬥民主派 新東補選亂上亂

立法會四個議席空缺將喺明年三月舉行補選，而被取消議員資格嘅青年新政游蕙禎、梁頌恆表明唔會參與九龍西同新界東補選，民主派亦已就新東補選進行初選，其中聲稱獲青政支持嘅中大學生會前會長兼前學民思潮發言人張秀賢力爭出線，但突然傳出傘後團體「社區網絡聯盟」發言人、沙田社區網絡主席劉頴匡有意參選，亦傳獲青政支持，而梁頌恆喺接受傳媒查詢時表明若劉參選將會協助佢。若果劉頴匡確實參選，隨時爆發本土派大戰民主派，令新東補選「亂上加亂」。(呢班友為左錢，咩嘢都做得出啦！何懼狗咬狗骨。)

空穴來風，未必無因。劉頴匡前日喺Facebook發咗一段「嚴正聲明」，話唔再支持「香港獨立」，並全心全意擁護及熱愛《基本法》(唓！真係信佢一成，雙目失明呀)。參選嘅意向呼之欲出，唔知佢係咪驚「港獨」過唔到參選確認書冇得參選，所以洗定底先？抑或係想拉攏民主派支持？ 

但民主動力早前已公布包括張秀賢在內等三名人士參與新東初選，依家突然傳出劉頴匡正積極考慮參選，並且有傳獲青政支持。究竟邊個先係青政支持嘅人選？梁頌恆尋日接受傳媒查詢時承認早已知悉劉頴匡嘅參選意向，又認同劉頴匡喺不分光譜支持抗爭者嘅立場上，同自己一致，仲話若果劉頴匡參選，會盡力協助佢。撐邊個都講到好白喇！

其實，劉頴匡同張秀賢可謂由細鬥到大，佢哋早喺母校順德聯誼總會梁銶琚中學曾競爭學生會主席，當年劉頴匡中六，係其中一支學生會莊嘅主席，細佢一年、當時讀中五嘅張秀賢就係另一支莊，但當年參選嘅有四支莊，最後劉張都輸咗，而兩個人就係咁由中學鬥到中大，依家再由中大鬥到新東補選。

劉頴匡尋日接受查詢時直認正積極考慮參選，會同梁頌恆、自己嘅團隊，同埋民主派好好溝通，強調最重要係尊重梁頌恆嘅意願，因為議席本身係佢嘅，佢嘅意願係需要受到尊重。佢仲話唔希望補選變成本土派大戰民主派，所以會同各方有充分嘅溝通，相信溝通能夠減低衝突嘅機會。

至於張秀賢就話最近有同劉頴匡接觸過，話如果劉要參選佢都阻止唔到，強調如果想贏番個議席，就必須要拎晒民主派同本土派嘅票，相信仲需要有更多嘅溝通。被問到有傳青年新政會支持劉一事，張秀賢話最近冇同青政聯絡，但如果此事屬實，認為青政應該要同佢有所溝通。