冤枉甘心

取締籠床造劏倉

劫貧製富更荒唐

公款盡填無底氹

欲建廉屋欠地方

聽聞話、今日劏房居民已經超過廿一萬。除咗上唔到公屋嘅窮街坊局住做劏民之外、還有一些行政人員和專業人士都係劏民嚟。佢哋之所以做劏民、無非係買唔起全球最貴嘅私營房屋、亦無法應付高企嘅租金而矣！其實劏房租金一啲都唔平、一間八十平方尺嘅劏房月租閒閒哋都要三四千元。但諷刺嘅係、揸拂當局有地賣而冇地興建公屋吖嘛！

一直以來、揸拂人自稱很努力覓地起屋、專業反對團體亦努力反對、發錢商越賺越肥、大庫房水漲船高、而劏民數字亦步步高升。嗱、呢幅獨殺一方圖真係好睇過清明上河圖。當你看過此圖之後就會曉得、乜嘢叫作詐癲納福架喇！揸拂人之所以反問地從何來並不等如冇地、而係冇地起公屋啫。當局明知到邊疆大部份土地都被大戶囤積起來、便向搵食地打主意、除咗惹得天怒人怨之外、仲要被垃圾尊貴大罵乜迫民反。呢齣爛戲演成點、大家有眼睇。唔通豬八萬所講嘅「乜商乜黑勾結」係真嘅？

雖然基層街坊起勢呻一年比一年手緊、但薪高福利厚嘅財務大總管劏房哥一啲都唔覺喎！佢連向街坊每人派一封利是仔以作回饋都唔答應、原來係要將錢儲起來為那些打死狗講價嘅大型工程填氹。例如揸拂堂向垃會要求通過一筆五十六億嘅造路工程撥款。原來該工程早在三年前以經拍板、造價本來是廿二億、但有關單位拖足三年尚未開工、以致造價飆升一點六倍。我終於明白點解財務大總管一直不肯派錢、原來係要為大型工程填氹嘅。講起嚟、自從大歸之後機乎所有大型工程都變成無底深潭、已經計唔清楚究竟使咗幾多冤枉錢咯！呢個劫貧「製」富嘅財務大總管都可謂、善財難捨、冤枉甘心咯！