知衰就改啦

唔怕派得奀

記堅要平均

租金平民化

自可免紛爭

呢嗱、人係咁嘅、齊齊閉翳相安無事、錢分唔勻肯家出事。自從阿茂宣布派銀之後、登時變作萬人插。雖然阿茂再三變陣以謀補鑊、但依然逃不出萬人插嘅命運。坦白講、阿茂派銀要一年後才能兌現、擺明唔係急街坊所忽、而係選擇性買人怕、唔被人鬧爆才怪。人係有貪念嘅、家陣現兜兜四千両喎、而且仲係街外錢嚟、梗係人人都想分一份啦！現在眼光光睇住人家個個有得份、獨係自己就食白果、除咗跌錢懶執嘅富人之外、剩下來嘅人當然嘈到拆天。古語有云、不患寡而患不均。凡係着數呢家嘢、一係就斗零都唔派、一係就派得勻循啲、而且要快。咪過像呢趟咁、置人性存貪念之不理、連中廠基本面子都被丟埋、咁笨策吖嘛！

其實搞甚麼扶貧或派銀並上非策。若然中廠有心減輕社會上嘅怨憤、就嗱嗱聲去覓地多建廉租屋。當窮街坊有咗「安樂」居所、社會都會平靜一些。正如上咗樓嘅街坊話齋、佢哋有錢食好啲、冇錢食平啲、無須再擔心唔夠錢交租、成個人輕鬆晒。大老闆曾經多次講過、興建廉租屋係唔會在數市構成競爭、中廠應該朝着這方向走。之但係、中廠卻調轉來做、批准居屋進人樓市交易場、使得較穩定嘅二手樓價錢也瘋狂飆升。梗係啦、無論在中廠、行企會、以及垃圾會裡面都有不知有幾多人係靠「炒幾炒」而攢爆個荷包嘅。如果罪惡城內冇樓宇短缺問題、又焉能會引起劏房泛濫問題？如無劏房泛濫、又焉能凸出本城鬧樓荒？如本城不鬧樓荒、表叔表嬸放在夾萬裡面漚到發霉嘅銀両又焉能回復立令？所以喇喎、為着提升既得利益者嘅利好形勢、惟有狠心啲都要嘞。嗱、家陣阿茂派銀過你哋呢班姨媽姑姐and 嗰班學生哥和年輕無業遊民囉！希望大家收咗銀両之後識做啲、咪咁多噪音喇！之但係、白鴨幫幫主刺蝟哥呢頭收咗揸拂人打得姐三萬両贊助、嗰頭又話絕唔會因此而對中廠嘅睇法有任何改變嘅喎！唔知你又信唔信呢、吓？！