究竟要玩到幾時？

既然拒納安全法

難怪妖人脷刮刮

事關擋架有賞銀

繼續吹水嘴唔抹

嗱嗱嗱、罪惡城唔止係言論自由、而且仲係吹水唔抹嘴嘅天堂嚟。戰中頭領夭蜓堅持自己宣揚獨立建國嘅地坊是在台島而非罪城、仲擺出一副「你吹脹我咩」嘅態度出來𢽴眼𢽴鼻、氣得泛藍班友呱呱亂叫。於是乎、有人引用內地喉舌所指獨立建國係違反紅家憲法、迫使罪城第一大教館將妖蜓格扯。喂喂、阿哥、阿姐、你哋唔好玩啦！人家大教館館委會大佬你個章話到明、如果妖蜓違法大教館自會跟進。我唔知泛藍聽得明冇、但我就聽得出除非泛藍能夠拿出證據來證實妖蜓違法、否則大教館愛莫能助。即係將個波踢番畀泛藍囉！

家陣罪惡城沿用嘅歸本法並無禁止講獨、神州憲法與罪城連個屁嘅𠸎𠹌都冇、而妖蜓確係在菜英子嘅地頭（本城管治範圍以外地區）宣揚獨立建國、咁又焉能憑空加罪於妖蜓呢？難怪泛黃班友群起呼冤枉啦！嗱、別忘記泛黃陣中有好多人都係跟妖蜓一樣、係法術界大行家嚟。佢哋係依足當前法規來跟紅家玩遊戲嘅。莫講話泛藍吹佢哋唔脹、就算係中廠都冇晒符至係。可笑嘅就係、嗰班知啲唔知啲嘅戇居人胡亂引用在本城無效嘅紅家憲法來𢱕妖蜓吖嘛！所以話啫、唔怕神一樣的對手、獨怕豬一般的隊友就係咁解。嗱、現在泛黃學足花家大佬喪普（警告紅家總舵主白上羽別利用放棄收購花家大豆為手段、報服花家徵收紅家貨品懲罰性關稅）一樣咁惡死、警告中廠咪食住獨立建國條水趁機擺安全法上台。嗱、泛黃確實可以扮睇唔見確立安全法係歸本法規定嘅講人責任和義務、但連中廠都扮睇唔到就確實令人費解。要打嘅仗總係要打的、雖然可避一時、但始終都要拿出勇氣來面對。恕在下以小人之心以度君子之腹、那套「等待城中政治氣氛和諧才將安全法擺上台」嘅講法只係逃避責任嘅借口嚟。假如再堅拒立法、等同任由本城街坊繼續被政棍當傻仔咁點、任由黃藍兩邊擁躉加劇仇視、任由社會兩極化加深、而自己搵夠就劈炮返祖家。搞成咁、究竟係紅家患上政治性陽萎、抑或係罪惡城揸拂人吞噗成癮呢、吓？！