唔通來賓有狗仔﹖ 大學生?錯贊助 狗餅店主含淚婉拒
2018/04/07 08:41:04
網誌分類:
生活
| 大專學生「上莊」（做學會幹事），通常會「?sponsor（贊助）」令學會搞活動時體面一啲，不過有時叩門求贊助都要睇清楚啲，否則可能鬧出笑話！好似一間專門售賣狗狗零食嘅網店「曲奇咖啡室」近日喺facebook發帖，話有一班大專學生想搵佢哋贊助就職禮上嘅食物，令佢哋超級震驚咁話！呢班同學漁翁撒網咁搵贊助，唔睇清楚店舖係賣乜，竟然搵賣狗糧嘅店舖，認真搞笑！ 「曲奇咖啡室」出帖，話有大專生聯絡佢哋，指佢哋學會喺本月二十五號會舉行就職典禮，需要提供食物及甜品畀唔同院校嘅來賓，約有三百人。同學仔話，見到該店嘅食物相好吸引，想睇吓店舖有無興趣贊助佢哋，數量唔使好多，夠三十至五十人食就足夠。 該店喺帖文中話，佢哋賣嘅狗狗食品係用天然材料所製，雖然可以畀人食，「但考慮過食品本身嘅硬度係啱狗狗食，我哋只好含！淚！婉！拒！！！」小妹同網店負責人石先生傾過，佢話事件發生喺前晚，有個來自心理學會嘅同學傳上述短訊畀佢，佢問同學仔來賓之中係咪有狗仔，同學仔先發現自己搵錯舖頭，即刻道歉。 石先生話，佢將事件放上網，唔係公審同學，反而係覺得佢哋好可愛，「我都好體諒佢哋，大專生第一次擔當成年人嘅角色，要舉辦咁正式嘅活動，係好大挑戰，忙中有錯都係必然會發生嘅。」為咗保護同學，佢拒絕透露同學係邊間院校嘅學生。唔少網民都覺得事件十分搞笑！ KellyChu |
 | |
| |
 | |
|
回應
(0)
我要發表