阿姐果然好打得

亂制玩自揩

妄想標松柴

明知冇收獲

硬將氣力嘥

阿藍要在垃圾會召開批鬥“曾經將祠堂裡面嘅祖先神主牌倒轉來擺”嘅松柴井、但遇到黃仔極力阻撓。理由係、黃仔認定咁做等同政治迫害松柴井。嗱、阿藍今次真係小題大造。反轉個木牌啫、又唔係反轉佢阿爺、使乜搞到批鬥咁大件事？人家六判爺都唔認為冇必要重罰松柴井、你班阿藍又何必苦苦相迫？今時今日、講惡亦輪唔到你哋班藍仔啦！知冇？何況罪惡城係一個“講”法治嘅地方？要指控人都必須要有法例依從吖嘛！請問阿藍一聲、家陣本城有邊條法例係唔准人倒轉神主牌來擺放架？

嗱、人家妖蜓擺到明唔止要鼓吹罪惡城獨立、而且還要跑到扶桑和台島等地散播神州大地上所有民族都可以獨立、罪惡城就係冇法例管得到佢。那怕西廠大總管士心民跳出來話、家族安全係無大細與圈大圈之分、但中廠一姐就睬佢都戇。咁即係話畀士心民知、罪惡城並唔係西廠講過算數、總之一姐一天不表態、即使總舵主開腔亦只能算得上係屁話嚟。君不見白鴨幫長老塗粉新大大聲話“立法權係在一姐手上、幾時立法只能由一姐講過才算數、輪唔到其他人喺度阿支阿左。如果乜乜夠薑嘅話、咪炒咗一姐囉！”坦白講、呢番咁具挑釁性嘅話、聽起確係有啲硬耳、但諗深一層就會發現塗粉新只係講實話。佢講得啱、罪惡城權力最大嘅人就係一姐、佢挾啥自重其他人都吹佢唔賬嘅！那怕登陸成跳出來講甚麼“一姐在任期內都唔完成立法太令人失望。一個兩砌都將要超過左一半年期、再唔立法係講唔通嘅。”係呀、真係講唔通加！之不過、阿姐就係當你哋班廢柴發噏風、家陣你哋吹吹咩？