大和解係大跪低？

息爭原來係跪低

頻頻蝕底確堪危

今日齋講無道理

原來法治已歸西

剛剛大和解又發功了！垃圾會嘅痕症管理委員會（痕管會）決定免去打包四人組欠下垃圾會一千二百萬両責項、只係求其追番四人購賣笨公室用品嘅支出就算數。嗱、在下並不是針對一姐堅持大和解、更無意指黃藍兩營私相授受、而係有點不明白、既然決定係由痕管會定下來、何解只係由黃營代表郭大俠單拖企出來交代、而藍方連一個代表都冇之嘛！講真、銀両呢家嘢公家大賬戶裡面多的是、區區千両銀子只係濕濕碎、討不討回並唔係問題。之但係、公家出爾反爾、就係極之嚴重嘅問題嚟。堂堂揸拂單位連原則都守唔緊、講過嘅話又唔算數、叫街坊以後點相信佢哋？之前嘅大放生、近日託詞拖延立家法、今日嘅大跪低、如此種種焉能服眾？家陣搞到亂講無罪、搗蛋有理、難怪街坊埋怨今日罪惡城已經到咗和尚打傘（無法無天）嘅地步啦！講開又講、家陣吓吓都係只有黃仔着而無其他人着、究竟算唔算係罪惡城全城被騎劫咗呢、吓？！公家原則何在？本城法治又何在？點解會有人權力大到無須向全城街坊作出合理交代、就一而再、再而三放棄對違法及搗亂社會安寧破壞者嘅追究？究竟罪惡城現在係法治抑或係人治嘅呢？古語有云：“賞不行，則賢者不可得而進也；罰不行，則不肖者不可得而退也。”今日罪惡城淪落到道理講唔通、惟有講陰功嘅地步、究竟是誰之過？