唔係秘史（五）

黃仔行為非偏見

更加唔係發花癲

金主有令齊搞作

鬼也推磨亦為錢

西廠大當頭十二哥在聯歡會對黃仔尊貴講、應該放下偏見並攜手為罪惡城創造美好嘅未來。嗱、在下唔知到、究竟十二哥係真不懂還是假不懂、居然將黃仔嘅反紅行為視為偏見。坦白講、逢宗必反可以話係偏見、但擺明車馬做「專業看更」就絕對唔係偏見而忠於職守。你睇、呢班人完全不顧街坊利益、挖出一些不成理由嘅理由來反對「一站兩份」嘅利民措施、就知我冇講錯。事實上、黃仔係靠街坊捧場才有機會做尊貴。之但係、呢班人現在公然冒着冇得再留低之危、而妨礙街坊享有「方便過關」嘅權利、所以件事絕非個人偏見咁簡單的。

從黃仔始終不渝的去做「防毒法」嘅攔路狗看來、其心根本上不在罪惡城福祉、而係要維持收受黑金而無王管嘅現狀。所謂收人錢財替人消災、誰是黃仔嘅服務對象一目了然。難道你會相信世界上有人會無端端畀錢過你使？你能不能解釋一吓、點解一個踐踏有色人種權利到了無以復加地步嘅白番、居然會對我哋呢班黃面佬關心起來？為咗民主、人權、自由？就算我係咁講、恐怕你都唔會相信啦！係冇？當下罪惡城依據歸本法奉行「河井兩制」這種與大陸截然不同嘅制度。之但係、某些街坊唔止冇好好的去珍惜、反而做出很多過火行為來打擊這個制度。試問、呢班人唔係正在強姦主流民意又係乜？我話過你知啦、呢班人已經中毒太深、佢哋唔止係對宗主有偏見、而且係要以做二五仔為榮。十二哥𠸎佢哋講放下偏見、簡直係對牛彈琴。如果我係十二哥、就會去勸勸一姐拿點善意出來為街坊福祉積番啲陰德、以免一個唔覺意跌咗落去那萬劫不復嘅深潚去吖嘛！