域 流亦詩
域 流亦詩
域 流亦詩

2018/07/25 14:27:36 網誌分類: 講東講西
25 Jul

盲丙扮晒醒

亂咁將人整

買板唔知埞

衰格夾難頂

 

江湖流傳、一名在椰樹省三每口市拍戲嘅禾日城女導演在酒店睡覺時、機乎被鄰房嘅一名飛機師學徒強姦。當女導演驚醒過來時發現有一名陌生男子對她有所動作、便猛力將他推開、然後揮動雙手猛打該男子、直至他退出其房間為止。事後女導演跑到三每口市派出所報案、但坐堂嘅值日衙差卻一味勸她和解!其間、有人警告她、若然堅持落案嘅話、她本人亦會被控以毆打他人罪。由於事主不懂當地法律、惟有離開派出所、然後返回禾日城、繼而在飛時卜上公開此事。嗱、當事情公開之後、很自然地在互聯網和輿論界牽起一陣嘩然。好嘞、當事情鬧大之後三每口市派出所通知女導演、沙嫌果子已經被捕、並要求事主前往派出所落口供。

 

我並唔打算討論事件之中是否暗藏利益輸送這類問題。我講緊嘅係、在今時今日這個資訊發達年代裡面、居然仲會有差人蠢過隻豬、連來人是何方神聖都搞唔清楚就胡亂拋人家浪頭、委實無知到令人驚訝!開口有話、就算要「蝦仁」都要睇定啲先、然後才起筷吖嘛!今次嘅事主係一名教人演戲嘅專家嚟、而呢班盲丙卻貿貿然咁去「恰」人、咁咪攞嚟衰囉!仲有呀、椰樹省係中央落重本去經營嘅一個具代表性嘅重心城市嚟、呢班二打六居然驚衰得唔透徹、好惹唔惹去惹一名禾日城導演、搞到個互聯鬧爆大六衙門冇個好人、分分鐘會傳到阿爺隻耳仔度吖嘛!班友仔梗係壽星公弔頸、嫌命長都未定咯。點解連三歲小孩都懂得驚嘅嘢、班死牛龜咁大隻嘅衙差居然買板唔知埞嘅呢?難怪有咁多人都話、上面當差嘅人人錢揞眼、個個冇心肝啦!嗱、今次呢件事最終會唔會被依法辦理、我唔知到。但我睇得出、上面打貪還有很長很長的路要走。如果唔將下面班蛇蟲鼠蟻肅清嘅話、打幾多隻大老虎亦係徒然。前線公人是直接面對街坊的、佢哋嘅行為與態度係直接影響到街坊對管治當局、甚至國家領導人嘅觀感。誰敢掉以輕心、誰就輸硬。

 

 

回應 (0)
我要發表
user

最新回應

*KK*
*KK* 2019/09/18

兄台眼光獨到. 不出一年就有大龍鳳睇了.

"污膠藤"單野, 不知若傳到近日來港的"毒眼寒流柑"之祖家又如何呢? 若彼邦之"安胃女孩像", "神大將軍像", 甚至"安義士像"等受如此對待, 真不知此"柑"會否敢在祖家國民面前仲乜野物野囉...

多年來各大爛仔館既欺師滅祖, 以至人性夏令營等精彩場面, 真係值得透過寒流輸出至全球! 彼此認識, 促進交流呢! 世界必有新氣象, "時代革命性解放"嘛!!!

開心van仔
開心van仔 2019/09/18

你好,很久不見了!我沒有在頭條寫野也有一年了!今天突然回來看看,高興見到你呀!近月心情很沉重,太多負面新聞令人情緒低落,不知亂局何時了!

123331
123331 2018/08/22

亞域哥,「來者應,去者靜。法住無常,止心一處。」謝謝。

開心van仔
開心van仔 2018/08/22

很喜歡看你的文章,為何不寫?你今日的話令我有共鳴!我進入古稀之年,剛做了第二次通波仔手術,對世事已不再熱衷了。只希望可開心過每一天。回望過去幾十年人生,很多事都淡忘,只記開心的事,不開心的由它去!現在對很多事都淡然處之,只爭取多些時間與孫兒們相聚。

祝君身體健康,生活愉快,開心每一天!真希望可再見你的文章!