不得依牙鬆槓

無中生有廿三兜

思歪亂噏口唔收

阿姐扣留捉妖法

掃毒無須你來愁

俗語有講「旁觀者不得依牙鬆槓」吖嘛！思歪已經唔係本城一哥啦、但係仲繼續對本城事務指手畫腳。好似最近咁、外族妓者協會邀請蚊族社社長神嚎癲到該會演講「脫宗獨立」和「打倒一擋獨大」、而嗰壇過氣一哥思歪卻跳出嚟亂噏廿四、說甚麼根據「歸本法」第廿二兜但規定、但凡發表分列國土言論和勾結外族干預本城事務皆屬違法嘅喎！喂喂、思歪、你係咪食咗忽得、搞到忽咗上腦呀！家陣罪惡城冇你所講嘅廿三兜嘅喎！唔該你唔好再喺度亂噏廿四、否則𢯊你上堂、順手執劑「妖亂公安」過你嘆架！你冇理由唔知到、廿三兜早就被一姐扣留咗架啦！總言之、佢一日唔肯擺廿三兜上台、罪惡城就一日都係播毒自由、反龍自由、甚至與外族聯手翻盅亂講都有自由。因為廿三兜尚未被確立吖嘛！明未？

仲有呀、阿爺唔係盲亦唔係聾架、佢知到罪惡城發生緊乜嘢事架！家陣阿爺檔攤日日被人喊打喊殺都唔出聲、咁就即係冇事啦！既然係咁、幾時輪到思歪喺度𧧝𧧝𧨊𧨊兼依牙鬆槓？坦白講、今日話事嘅係打得姐、佢鍾意點做都得。試問誰可以奈何得了她？何況在打得姐登基之前就已經有言在先、話明要同黃黨玩大傻解遊戲嘅。家陣佢扣留起不利於黃黨運作嘅廿三兜、放生黃黨多名阿頭、掟錢出嚟餵白鴿、對港毒行為亦以精神上全力反對、這一切通通都只係堅守誠信嘅結果嚟。試問、家陣係咪守諾言都唔啱先？我勸思歪都無謂攞出那些甚麼「聞俗大異」來壓一姐、我肯定佢唔受呢一套嘅。吓、點解？嗱、一姐將會點做我真係唔知到。之但係、如果比着係我嘅話、當合約期滿收夠酬之後便舉家回復大影細閣子民身份、重返祖家安享晚年、一定唔會留低喺罪惡城步監箏後塵咁戇居。