全港年宵市場開鑼 有營午餐肉攬枕㩜 唔怕非洲豬瘟
2019/01/31 04:12:16 網誌分類: 生活
農曆豬年幾日後來啦,維園年宵市場好多乾貨攤檔主打「豬」主題,售賣各式各樣「豬仔」產品。有檔主將攤檔佈置成豬肉檔,化身「豬肉佬」,大騷胸肌,大賣午餐肉攬枕,標榜自家豬肉健康有營,「食」完健健康康,一定唔怕非洲豬瘟。檔口負責人林先生就話,要改變「港男」嘅形象,祝願市民好似「豬肉佬」咁大隻,新一年高大威猛。
珍珠奶茶店開到成行成市,有學生哥玩埋一份,將呢股熱潮帶到嚟年宵市場,設計出以珍珠奶茶嘅造型公仔,又有主要銷售豬仔為題的暖手枕及環保袋。唔少人都讚佢哋個設計有特色同有創意。小妹梗係會買番杯「珍豬奶茶」,支持一下班後生仔同本地創作啦!
行年宵唔少得買年花,有花檔檔主就話,今年天氣夠暖和,好多花提早盛開,有啲花唔擺得耐,變相不合時,而最受市民歡迎嘅桃花就朵朵盛放,受去年超強颱風「山竹」吹襲影響,桃花減產來貨價貴咗,但有檔主話唔敢加價,維持薄利多銷。
Kelly Chu
■有男士扮成胸肌凸出嘅「豬肉佬」,大賣「健康有營午餐肉」。
■售賣豬仔毛公仔攤檔最受小朋友歡迎。
回應 (0)
我要發表