點首歌比你聽8

情枷愛鎖，婉約纏綿，締造幾多感人肺腑蕩氣廻腸又能千古傳誦嘅愛情故事！由初邂逅，到有觸電感覺，到彼此試探，到開始交往，到步入初戀，到轉入熱戀，到確立對方成為終身伴侶，到步入教堂，到成合法夫妻，到成家立室，到開枝散葉生仔生女，每一個階段有可能延續，亦有可能到某階段就斷咗。過去嘅山盟海誓，你儂我儂，變成諷刺；試過嘅郎情妾意，朝雲夕雨，剩得遺憾。

今日，西風推介一首由黃霑先生包辦曲同詞，由鄧麗君女士主唱嘅【忘記他】：忘記他，等於忘掉了一切，等於將方和向拋掉，遺失了自己..... 所謂[前事不忘，後事之師]，人際間嘅感情世界喺好複雜！但喺一般嚟講，離唔開付出同接受；當付出時喺唔喺心甘情願？接受時有冇感恩珍惜？

有人認為舊嘅唔去，新嘅唔嚟！呢種睇法冇話啱定錯，重點在於變化嚟之前曾否珍惜？情感之所以能夠維繋，在於甘心付出而少計較少要求；相對地情感之所以產生惡變，在於唔再甘心付出而多計較多要求。凡此種種，癥結在於甘唔甘心，導致愛情故事嘅結局出現極端場面。

西風認為男女結交成情侶嘅過程當中，99%都喺show自己嘅優點長處好嘢，希望得到異性嘅認同；絶對唔會show自己嘅缺點短處衰嘢，驚住嚇親對方，則追求追逑就凍過雪水。不過，西風認為人能夠於交往時適當表露自己嘅唔好一面，對方如果能夠接納唔嫌棄下，先至稔下一步。否則，對方接受唔到自己嘅衰嘢，冇必要再進一步，如果唔喺好容易連普通朋友都做唔成！你話喺唔喺？