KellyChu - 海濱長廊休閒站 水上運動康樂區 1000無人機今晚灣仔飛舞 2大靚位必搶 | Executive日記

　　旅發局今晚8點將於灣仔海濱舉辦首場無人機表演，以佛誕同埋太平清醮為主題，向市民遊客送上祝福，並溫馨提示最佳觀賞位置係灣仔「HarbourChill海濱休閒站」及「水上運動及康樂主題區」，其他位置就可能受角度影響觀賞體驗喇，另外亦特別安排雪糕車免費派雪糕畀大家享用，增添節慶氣氛。

　　財爺早前喺新一份《財政預算案》增撥款項予旅發局加強旅遊推廣，包括月月放煙火和無人機表演等。旅發局趁五一黃金周已打響頭炮煙火表演，今次則係第一場無人機表演，由於香港較少舉辦大型無人機表演，因此Kelly好期待可以睇到呢場Show呢。

　　藉着佛誕同埋太平清醮將至，表演會以呢兩大傳統節慶為主題，由1000架無人機拼湊出包括高約60米嘅立體包山，以及頂部一個直徑達30米嘅「巨大平安包」，仲有太平清醮特色花牌、醒獅及廟宇等動態圖案，表演長約10分鐘，記得準備好相機影低咁多個亮點喇。

　　是次無人機表演喺灣仔海濱對出海面上演，但旅發局溫馨提示部分海濱場地會受角度影響而未能清晰觀賞，建議大家最好去灣仔「HarbourChill 海濱休閒站」同埋「水上運動及康樂主題區」，就可以欣賞到最靚最立體嘅無人機圖案，要留意嘅係對岸九龍半島係睇唔到呢場表演㗎。

　　為送上甜蜜心意加添節慶氣氛，旅發局今晚6點至8點，會喺灣仔碼頭入口靠左空地，向市民及遊客免費派發一人一杯雪糕，數量有限，派完即止。

KellyChu