珍惜香港
珍惜香港
珍惜香港

真正嘅良知

2019/11/18 12:31:33 網誌分類: 時事
18 Nov

六十人嘅緣結

就近期嘅所謂「政治事件」(其實我唔認為喺政治事件),已經退出咗兩個群組,其中一個,喺相識有三十年嘅大專朋友。最近又退多咗個,呢個群,有近六十人,喺我啲中學同學,同埋當年嘅老師。 

其實道不同,最多不相為謀啫,搞到要退群,都真喺幾無奈。尤其呢個群,雖然過咗咁多年,大家都已經唔喺好熟,不過果個年代,莫講話手機,就連傳呼機都未有,能夠聚得返近六十個人,實在好難得。所以早幾個月前,我已經提醒過大家,响一個近六十人嘅群組裡面講政治,唔太恰當。 

但無奈,結緣、緣結,彷彿早有定數。雖然我呢份人,唔會主動挑起爭論,但如果惹起我把火嘅,就邊個都冇面俾。不過火還火,我講嘢,從來都只喺對事,唔會將矛頭指向對方。但好可惜,你咁對人啫,人地未必會咁對返你,最後唔知點解,總喺會有人開始講埋哂啲衰嘢。講真,做咗幾十年人,一把年紀,都仲未知道乜嘢叫做分寸嘅,我肯受你地三次,已經俾足哂面。唔好問我,點解喺三次,狼來了,都只喺得三次,試問人生,有幾多個三次? 

想得到,就要付出

呢場反修例風波,真喺令人大開眼界,意識形態嘅「信仰」,原來可以將人嘅價值同道德觀念,扭曲到如此地步。佢地認為,上一代嘅香港人,自己享受哂啲經濟成果,唔肯為下一代爭取權利,令佢地冇哂希望。咁即喺話,上一代嘅人,反而比下一代幸福?記得香港以前啲廉租屋,冇電梯、冇大閘、冇保安,閒雜人等,自出自入,一個廁所,多戶共用,你攞公援嘅話,喺唔敢俾人知,仲隨時會有社處啲人敲門特擊檢查。點解我會知?因為我出身基層家庭,住過廉租屋,攞過公援。睇返今日啲公屋設施,比美私樓,你攞綜援嘅話,遲咗收錢,仲可以大聲投訴。我真喺睇唔出,上一代,點樣幸福過下一代。 

從一個住廉租屋,攞公援嘅家庭,努力到今時今日,我體驗過好多嘢,有醜惡,亦有精彩。但有一點好重要:想得到,就要付出,唔喺靠發難。發難,莫講話永遠達唔到目的,就連你本來擁有嘅,都會失去埋。當年中學冇電腦科,屋企又冇錢買電腦,都無阻我自學寫程式,結果响面試果陣,俾教授賞識,雖然 A-LEVEL 成績猛車邊,都可以入到去理想嘅學科。畢業之後,我响科技企業打工,成為升職最快嘅工程師,唔喺靠自己嘅努力同表現,唔通靠發難渣?到出嚟搞生意,都喺用自己儲返嚟嘅血汗錢,洗一分錢都好小心,點似得依家啲年輕人,未打過工就俾人舉去創業,仲要人地出埋錢俾你? 

當時仲要俾舊公司告,話我侵權,告足五年,賺多都唔夠交律師費,之後我地炒咗個吸血律師,跟著又俾佢追數,自辯連打兩個官司,最後擊退對手。可惜雨過天晴之後,電子行業衰落,只好放棄理想,忍痛結業。但幸好我之前節衣縮食,將錢儲咗响啲磚頭度,結果轉營開投資公司,同銀行合作,直到今時今日。回望整個辛路歷程,每一步,都喺無條件嘅付出,每一步,都喺响冇保證一定有成功希望之下嘅付出。講真,就算你肯付出,都冇話一定會有,但你發難呢,就一定冇! 

獅子山精神、中國民族精神

同樣地,香港嘅經濟、香港嘅制度,能夠發展到今時今日,靠嘅,亦喺上一代香港人嘅付出,或者簡單講,就喺呢五隻字:「獅子山精神」!因為任何社會,都喺由人民組成,人民嘅付出,就喺社會發展嘅惟一動力。無論乜嘢體制,乜嘢政權,民主也好,獨裁也好,都喺睇住個社會環境、人民嘅狀況,去制訂同優化政策,甚至體制。當社會穩定,人民競爭力強果陣,政策自然趨向放鬆同進取,但如果社會混亂,人質下降嘅話,政策就自然收緊同趨向保守,呢個就喺政權同人民之間嘅互動過程,世界各地都喺一樣。 

其實,所謂獅子山精神,本來就喺中國人嘅民族精神。我知道好多香港人,尤其喺啲本土派,一定好抗拒呢種講法,甚至視之為歪理。不過事實歸事實,中國人果種拚搏、勤奮、上游嘅動力,以家庭、群體為中心嘅傳統,跟西方自稱為所謂普世價值嘅自由主義、個人主義,形成強烈嘅對比。當年好多華人去到世界各地,都喺表現出色,甚至惹嚟妒忌。就睇返我地嘅祖國,改革開放以來,政治方面都仲喺咁保守,但經濟一樣可以突飛猛進,科技甚至直逼美國。依家嘅深圳,只要中央同意,隨時可以取代香港。邊個話,我地香港人,我地中國人,一定要响英國嘅體制、西方嘅體制之下,先至可以發揮? 

物質嘅背後

話說,果位過氣大師,响《我們都是香港人》裡面話,擁抱物質主義嘅上一代,以為年輕人嘅價值觀就只有物質。坦白講,佢成個發言之中,呢一段我最反感。香港嘅上一代,喺尊重物質,唔喺擁抱物質,响我地嘅年代,就算最基本嘅物質,都喺要靠自己努力捱返嚟,所以我地處事,喺有底線,因為我地明白,要得到,就必然要付出,而且有好多嘢,喺唔可以強求。但依家啲年輕人,自小唔愁基本嘅生活,响物質甚至心靈上,受到百般呵護,衣、食、住、行唔使講,其他如教育、資訊、上網、手機,甚至喺遊戲、遊學,一切以往唔喺必然嘅有形及無形之物,垂手可得,父母冇能力,就由政府承擔。 

我地當然唔會認為,呢班年輕人嘅價值觀,就只有物質。反之,佢地鄙視物質,鄙視,就喺因為來得太易,見唔到物質嘅背後,隱含咗幾多香港人嘅血淚。尤其喺俾「信仰」洗咗腦果啲,幾大嘅破壞,都視作等閒,因為佢地認為,破壞咗嘅,都可以整得返,但冇民主,就冇未來喎,簡直吹脹!我就話,呢班怪物,都可以叫做未來主人翁嘅話,咁香港,就真喺冇未來啦! 

上一代嘅童年,有幾艱苦,都冇人同情,今日一個 TSA,就成個社會,心痛得要死。其實無論邊個年代,邊個地方,人生,都唔會喺容易。呢個世界冇一處地方,你只要伸手,就會有人俾你,人地唔俾,就可以發難。我地點可以將年輕人,寵到如此地步?你地會害咗佢地一世!社會為年輕人,度身訂造一個未來,驚死佢地失去希望,但好可惜,度身訂造嘅未來,根本就唔現實,結果,希望幻滅,年輕人成魔。其實我地上一代,邊會有人餵埋啲乜嘢希望俾你,但我地嘅人生,反而就充滿希望,因為我地嘅希望,喺一筆一筆,由自己繪畫出嚟,每一筆都喺驚喜。 

真正嘅良知

話說群組裡面,有舊同學、老師,提到年輕暴徒中槍倒地,見我冷言冷語,就同我講埋啲乜嘢良知。恕我直言,呢啲唔喺良知,喺無知!你地睇埋咁多媒體資訊,啱咀型嘅,唔理真假,照單全收,呢鋪我都唔同你地計,但見有暴徒死傷,就喊哂口咁,你地究竟知唔知道,佢地傷害咗幾多無辜嘅人?果啲背後嘅生靈塗炭,媒體喺唔會報導。年輕人,好食好住,就揀去做暴徒,羅永聰話,佢地有「高尚」嘅目標,我無法認同。佢地爭取嘅,只喺一種意識形態,一種「信仰」,呢家嘢,見仁見智。但有好多人,喺冇得揀,佢地努力工作,努力賺錢,為生活、為家庭、為子女,甘願放棄自己嘅理想,我就認為,呢啲先至喺「高尚」! 

為理想,本來就喺自私,講乜嘢高尚?正如我成日話,創業唔難,守業唔難,停業,先至喺最難,而好多生意人,到最後都喺過唔到呢一關。每盤生意、每條產業鍊,涉及幾多生計?幾多家庭?當年我响自己仲有能力果陣,放棄理想,忍痛結業,賠足伙計,找清街數,呢啲就喺「良知」。但如果只為守住一己嘅理想,拖糧拖數,撐到最後,清盤收場,累己累人,呢啲就叫做「無良」!今日,年輕人要玩攬炒,就將香港嘅經濟,夾硬拉落嚟,有幾多中小企會倒閉?產業鍊破裂,有幾多人會陷入財困?幾多家庭破碎?傷嘅,全部都喺基層,我都仲未計掟磚、私了,燒人燒舖果啲,你地真喺仲好意思,响我面前,講良知? 

倘若你未曾試過,為至親、為朋友,甚至為咗唔認識嘅人,放棄自己理想嘅話,咁你就冇資格响我面前,講乜嘢良知。如果你為咗實現自私嘅理想,不惜走去做暴徒,傷害無辜嘅人,又或者,你只喺識得為暴徒嘅死傷落淚,而唔去否定、阻止佢地嘅行為,甚至响心底裡面,期望佢地通過暴力、通過所謂犧牲,去成就你自私嘅理想,咁莫講話你冇資格响我面前,講乜嘢良知,你連做我朋友嘅資格都冇! 

話說尋日班暴徒,搞咗理大成日,見到自己本科母校,滿目瘡痍,成個戰場咁,真喺無言。校長滕錦光,錄影呼籲各方停止武力,又話肯陪同學生自首。上次响畢業禮度,拒絕同蒙面生握手,就喺呢一位校長。慶幸母校,有呢一位校長,唔會好似段懦夫咁,向暴力跪低。真喺為年輕人將來著想嘅,唔喺去縱容佢地,為咗啲乜嘢理想,埋沒良知。身為一位校長,面對學生,如果連一句「你地做錯啦」都唔敢講,又冇勇氣讓佢地,面對錯誤,為錯誤行為負責嘅話,咁就請你辭職。 

勇於為他人,放棄自己嘅理想,先至喺真正嘅良知!

回應 (5)
我要發表
花姐
花姐 2019/12/22 21:09:55 回覆

如果連一句「你地做錯啦」都唔敢講

咁就請你辭職。

都幾難,咁好搵的入息,厚住面皮都要做到夠鐘先走人.

珍惜香港
珍惜香港 2019/11/30 01:55:26 回覆
上文我話,慶幸理大有呢一位校長,呢句我要收返。雖然滕校長未至於去到段懦夫咁廢,但好可惜,成個理大搞成咁,去到呢一刻,佢依然唔肯旗幟鮮明咁譴責暴徒嘅行為,只喺識得埋怨校址太方便成為據點

滕校長,理大唔喺呢次事件中最大嘅受害者,你地成班教職員,有事就全體撤走,等警察同你地拾手尾,之後連多謝都冇句,仲諸多挑剔。

最大嘅受害者,喺俾啲暴徒搞到雞毛鴨血嘅無辜市民,果啲傷害,喺無法修復!
小雄
小雄 2019/11/25 17:30:21 回覆

同意長河兄,無論怎樣, 前進才是唯一的出路。

歷史長河
歷史長河 2019/11/25 12:10:52 回覆

塵埃落定。風雨中的香港我們更要堅毅前行!

五十後
五十後 2019/11/18 13:34:50 回覆

我最反感的是這些大學校長整天嗌「各方克制」,而不遣責發動暴力的暴徒。

「各方克制」是等同叫受害人被迫害都不要追究責任!

user

已關注

最新回應

花姐
花姐 2020/05/16

根找不到,只能四處為家,可悲 {#iconb_225}

homan
homan 2020/05/15

父不要,母不認,畜生一只

歷史長河
歷史長河 2020/04/08

我當日聽完袁國勇的那番講話後的反應和珍兄差不多,覺得有些莫名其妙。我甚至問當時身邊的人什麼是帶抗體者?難道不是中過肺炎的患者嗎?那為什麼中招者少代表疫情嚴重?

愚公
愚公 2020/04/06

甚麽人或外力使香港的獅子山精神变了本土主義??英國要放棄会生金旦的鹅??!!美國又不欲中國壯大??!!各國又怕一國兩制开左好的頭,自己國內会有人有樣学樣要求??!!於是外國不停吹嘘拆台,話你中國一定做不好一國兩制,其實最守信,守承諾就是中國!!