中環金融才俊飯堂銀行家會所重開

2021/01/20 04:12:12 網誌分類: 生活

20 Jan

        　　去年告別置地廣場嘅香港銀行家會所（圖），呢個星期一喺新址重開啦！旋即成為中環金融界嘅熱門話題，好多銀行大班、金融才俊都話，好正斗嘅飯堂同會友地方番嚟啦！仲話好懷念會所提供嘅名菜，包括清蒸游水鮑同燉竹笙雞湯等等，話要去擦番餐喎！

        　　香港銀行家會所（The Hong Kong Bankers Club）喺干諾道中盈置大廈嘅新會址，本周一起開門試業啦！銀行大班話要約Kelly去食，一時之間唔知食乜好，因為會所有中西餐廳又有扒房，仲有酒吧，好多美食。小妹一向鍾意中餐多啲，所以對佢哋嘅名食，好似燉竹笙雞湯、清蒸海星斑、清蒸游水鮑同露筍帶子螺片，都念念不忘，仲有佢哋嘅點心都係一流嘅。

        　　呢個專為金融專才而設嘅私人會所，經常有金融界名人出入，係香港國際金融中心嘅重要會所。



        Kelly Chu