谷針抽獎數口精
2021/06/15 04:12:47 網誌分類: 生活
有航空公司捐飛行里數出來抽，聽到真的是「一殼眼淚」，我對上一次飛已經是去年一月，年半以來，儲埋的飛行里數苦無用武之地，今年一月到期的里數，已經拿了去換雪糕。近日一個電視廣告說「法國機票變了法國煲」，而我就是「美國機票變了美國雪糕」。明年一月更慘，有八至九萬分到期，夠換一張歐美premium economy機票有凸，難道到時又去換雪糕？食到肚屙都似。你如今還說抽飛行里數！
有地產捐兩千萬元禮券出來抽，頭獎一名五百萬，二獎兩名各三百萬、三獎三名各一百萬、四獎十名各五十萬……抽到可以用來幫他們買樓，又或者光顧名下超市、藥房、旅遊等。我心諗，幫你買層樓動不動過千萬，五百萬哪會夠畀？還要自己掏荷包大出血，一個唔覺意抽到的是五十萬、一百萬，跟你買樓，隨時是「執條襪帶累身家」，否則的話，難道拿五十萬去超市買汽水薯片，又或者去藥房買Panadol？
親身經歷，我曾經光顧該集團名下超市，因推廣活動，領到一張現金券，於是放在荷包裏，下次拿出來用時，竟被收銀員告知過期，原來有效期只得一個月，真是氣到我呢！希望今次會不會要人一個月內消費，買五十萬汽水薯片，又或者Panadol啦！
另外，有地產商則向打了針的基層派錢，受惠者可獲一千元現金資助，名額約五千個，計番條數，合共就是五百萬元，就算我無份，但也得說，比起前述，這就真金白銀，貨真價實得多，也幫到真正有需要的人。
蔡子強
回應 (0)
我要發表