歷史上保命招

歷史上有D人物, 智力高人一等, 一有危難就諗出保命招數ｏ

且說劉邦的謀臣陳平先生, 當年未發時, 去投奔困在四川的劉邦（被項羽整蠱封佢到四川）,  在某處渡河時誤上賊船, 佢見賊人以為佢身懷巨欵, 佢立即脫到赤條條（有內褲嘅！）話要幫手撐船, 賊人見佢都冇料到, 又抵得諗,, 於是放過佢, 後來佢先至可以成就一番事業！

佢老細劉邦仲堅, 次次被項羽打敗, 就三十六着走為上着（永遠唔會自殺！又永遠唔會認輸, 自怨自艾！）有次被項羽窮追, 佢居然嫌車上D細路（佢D仔女！）阻住架車速度, 踢晒下車逃跑！（呢D救命招, 普通人真做唔出！）又有一次連老豆老婆（呂后！）都留低被項羽捉咗ｏ項羽要將佢老豆煮湯飲, 佢就話, 我地係結拜兄弟, 我老豆即係你老豆, 如果你煮佢, 記得分碗俾我飲！吹到項羽漲！冇晒佢符！

可見非常人保命招數的確幾難學也ｏ

劉邦有個手下韓信先生又係, 寧願受跨下之辱都唔同人爭一啖氣, 留住條命, 再創一番事業ｏ

劉邦手下仲有個張良仲高橋, 佢見漢高祖劉邦（發鬼咗之後）開始殺功臣, 佢就詐詐帝帝話信咗神仙, 去練仙, 申請退咗休, 日日返教會, 唱吓粵曲, 跳吓社交舞, 避佐殺身之禍,仲鬼咁長命添,  呢Ｄ都係有計保命之人也ｏ

所以做人如果肯讀多D書, 識多D嘢, 識多D保命招數, 條命都會長D嘅, 知冇？