KellyChu - 慶祝風靡全球40年 大型沉浸打卡體驗 麥樂雞展今起登陸西九文化區｜Executive日記

小妹從細最鐘意食麥樂雞，雞肉「滑捋捋」，唔肥又唔油。唔經唔覺麥樂雞就誕生咗40年，趁住呢個日子，香港麥當勞就聯乘多界別創作總監Kevin Poon（潘世亨）及5位國際知名當代藝術家，喺西九文化區「Arts Pavilion」，舉辦全港首個大型麥樂雞主題藝術展覽「Coach McNugget Art World」。展覽今日正式開幕喇，大家快啲去睇，真係食得又睇得！

有互動沉浸式藝術體驗

展覽即日起至8月20日喺西九文化區藝術展亭舉辦，展覽場外設有美籍韓裔藝術家VANDYTHEPINK設計、逾2米高嘅巨型麥樂雞盒，同時有Team McNuggets®總動員喺戶外迎接大家，好似小妹咁熱愛打卡嘅你又點可以錯過；展覽亦有英國著名童趣風格藝術家Jon Burgerman，受麥樂雞啟發創作嘅最新作品，包括帶有強烈個人風格、色彩繽紛嘅繪畫。

另外，荷蘭數碼藝術家FrankNitty3000，今次亦特意帶嚟互動沉浸式藝術體驗，等大家喺超現實嘅沉浸式世界中，探索麥樂雞嘅無限可能。

Kelly Chu