KellyChu - 引入多種原生和外地植物　上班族市民親親大自然 太古中央廣場「城市森林」 | Executive日記

香港人口稠密，地小人多，缺乏大面積嘅綠化休憩空間，但Kelly最近發掘到石屎森林入面有一片綠洲，就係位於太古坊嘅太古中央廣場。走入花園滿眼翠綠，樹影婆娑，池水粼粼，仲有多種本地和外來植物，吸引附近昆蟲和鳥兒棲息。閒坐多樣性植物蔭下，可與大自然近距離接觸，實在係城市人福音。

　　太古中央廣場引入多個原生植物物種，為本地鳥類、蝴蝶、昆蟲及其他動物，提供理想棲息地和食物。香港戶外生態教育協會（OWLHK）嘅專業生態導師Hugo話，廣場嘅位置喺柏架山與海濱之間，從而形成一條通道，讓烏兒可以飛過，中途休息。遊花園嘅時候，Kelly見到兩隻可愛小雀站喺假蘋婆樹冠上，原來係剛成年嘅紅耳鵯。

　　Hugo介紹咗多種本地原生植物，令小妹大長知識，其中一個叫鴨腳木或鵝掌柴（Ivy Tree）嘅香港常見樹種，原來好有價值，因為係少數會於冬天開花嘅植物，所以成為冬蜜嘅來源，其樹葉亦都係白傘弄蝶嘅主要食物，廿四味其中一味，更係用鴨腳木嘅根莖作為原材料。

　　除咗常見樹種，廣場裏亦有一些香港稀有及珍貴植物，例如本地樹形蕨類植物刺桫欏，佢喺6500萬年前就已經出現，曾經係草食性恐龍嘅主食，因此又有「活化石」之稱。與香港名字起源有關嘅土沉香，都可以喺呢度搵到。嚟呢個都市後花園散步，同時都增加咗小妹對香港大自然嘅認識，好開心。

KellyChu