KellyChu - 精緻產品與本地品牌聯承 迪士尼利工民內衣大受歡迎 | Executive日記

香港迪士尼樂園度假區喺上個財政年度嘅業績大為改善，虧損大幅收窄，希望本年度會轉虧為盈。Kelly係迪士尼粉絲，聽到都開心。香港迪士尼行政總裁莫偉庭好高興業續大反彈，仲特別提到團隊好有創意，推出不少得意嘅產品，部分加入咗本地品牌元素，好似聯乘利工民內衣、駱駝牌暖水壼等，十分搶手，小妹見到都想買。

　　莫偉庭昨日親身攞住迪士尼嘅產品，擺post俾記者影相，表現得相當自豪，其中有迪士尼與利工民合作推出嘅小朋友棉質內衣，參照咗李小龍打功夫時着嘅白T恤設計，唔單止帶有傳統特色，仲好吸汗，所以唔少家長都買畀小朋友着。至於駱駝牌暖水壼，色彩鮮艷，仲印上咗迪士尼卡通人物，人見人愛。

　　另一個系列產品，係迪士尼與東京時尚品牌FDMTL聯乘推出嘅唐老鴨90周年精品系列，成為日本遊客最鍾意嘅手信之一，因為日本當地都買唔到㗎。

　　此外，天氣酷熱多雨，莫偉庭話，園方會善用科技，識別高溫地點，多植樹同加設降溫措施，又增設遮蔭設施等，務求訪客玩得舒適，而紀念品店會售賣雨衣及雨傘產品，當落雨時，遊客可以選購，繼續去玩。

KellyChu