KellyChu - 一哥親臨打氣 同袍戰績彪炳 港警出戰世警會收穫多面獎牌｜Executive日記

香港警隊正喺加拿大出戰「世警會2023」，好消息不斷，各位運動健兒又再斬獲多面獎牌。而警務處處長蕭澤頤今次唔單止帶隊越洋參賽，仲2日內走訪8個比賽場地，為各位同事打氣。佢臨回港前仲勉勵大家要「唔係猛龍唔過江」，之後繼續奪取佳績！

「世警會2023」賽事舉行咗4日，警察龍舟會、乒乓球會、單車會、游泳會、田徑會、 歷險會、箭藝會、 射擊會、網球會、 排球會同拳擊會都不斷捷報，各位運動健兒至今共摘得30面金牌、24面銀牌同16面銅牌。一哥蕭澤頤今次特登帶隊越洋到加拿大溫尼伯，並喺2日內，走訪咗8個唔同比賽場地，親身為比賽緊同奮力拼搏嘅警隊運動健兒打氣。

而一哥亦喺回港前，接受警隊同事訪問，大讚警隊女子籃球隊面對勁敵，毫不畏懼，靠強大嘅團隊精神，越打越好，最終戰勝對手。一哥亦勉勵各位運動健兒，「我哋唔係猛龍唔過江」，之後要繼續奪取佳績！

另外，警隊女飛魚藍雪亦為警隊攞到一面100米女子蝶泳銀牌。藍飛魚賽後就話，好開心可以幫到警隊攞獎牌！

Kelly Chu