KellyChu - 新地單車節10．22舉行 記得下周三報名參加喇｜Executive日記

各位單車健將注意喇！旅發局宣布，今年「新鴻基地產香港單車節」喺10月22日舉行，分成幾個組別，專業車手同普通市民都可以參加。其中「國際單車聯盟（UCI）1.1級公路賽」係闊別5年再度回歸，近百名世界各地專業單車好手，屆時將會來港進行總長100公里繞圈賽，切磋車技。而維港邊嘅鬧市公路，到時會搖身一變成為國際賽場，市民可以近距離睇比賽為各位健兒打氣，同時感受單車疾馳嘅快感！

另外，單車愛好者都可以參加非競賽項目「50公里組」及「30公里組」，沿住青馬大橋、汀九橋、昂船洲大橋、長青隧道、南灣隧道、尖山隧道等「三橋三隧」，挑戰自我。名額共有5200個，下周三早上10點起網上報名，先到先得。首次參加或只曾參加過2017年或之前比賽嘅市民，要喺下月16、17或23日參加免費嘅單車技術評核。

Kelly Chu