KellyChu - 港鐵原創「LOUDER」店登陸「圍方」 3「女強人」撐年輕人創意產品｜Executive日記

為支持香港原創品牌，港鐵公司發揮創意，喺去年推出全新O2O零售品牌「LOUDER」，第3間分店最近喺大圍人氣新商場「圍方」開張，上架更多本地製造有心思又得意嘅產品，推動本地創意產業。Kelly認識咗負責呢個咁有意義項目嘅3位年輕女強人，佢哋希望促使年輕人能夠發光發熱，英文嚟講係好好嘅Empowerment（增強動力），達到o依家潮興講ESG以外再多一個（E）。

「LOUDER」係由港鐵一個年輕團隊自發創立和主理，源於團隊曾經喺工作上接觸到不少香港設計師及年輕創業家，被佢哋嘅熱情和理想所打動，決心「Make HK Brands LOUDER」（促使香港品牌響亮）。

產品包羅萬有

「LOUDER」嘅經營方式好特別，所有上架產品都係經過團隊精挑細選。佢哋親自甄選具創意同水準嘅本地品牌，再透過唔收租金嘅模式，提供免費銷售渠道，以令呢啲有潛質嘅香港品牌，可以喺市場上發光發亮。

產品從服飾、零食、飲品、玩具、寵物用品，衣食住行樣樣包羅萬有。而所有品牌獲得利潤後都會回饋「LOUDER」，形成一個雙贏局面。構思出如此有意義嘅品牌經營團隊，係由3位年輕女士主力打理，包括Kacy Chan、Irene Tam同Tiffany Leung。Kelly見3人活力滿滿，不禁都叫聲「louder girls」！

Kelly Chu