KellyChu - 大師Doodle即場創作 與小朋友互動 港鐵變身塗鴉世界 神秘太空船降落香港站｜Executive日記

文青Kelly又有好嘢推介畀大家！港鐵本月19日起會同藝術門畫廊合作，喺香港站港鐵藝術舞臺舉辦《太空中的塗鴉先生》展覽；而呢個周日下午4點，仲邀請到國際知名藝術家Mr Doodle「塗鴉先生」，首次到香港站即席表演塗鴉創作，將車站變為神奇嘅塗鴉世界。小妹一直好迷佢獨特嘅塗鴉風格，諗下到時可以親眼見到，個心卜卜跳！

19日活動當日，一艘2米闊、1.5米高嘅巨型太空船，會降落港鐵香港站。Mr Doodle會用特製嘅繪畫工具，喺太空船表面即席創作出標誌性嘅黑白塗鴉圖案。據小妹所知，Mr Doodle仲特別喺創作中融入港鐵列車圖案！另外，本地非牟利慈善團體就邀請咗十多名兒童，同Mr Doodle一齊喺太空船互動創作，相信小朋友到時可以發揮無窮童真創意！

作品完成後，本月19日至12月3日會喺香港站展出；而Mr Doodle嘅塗鴉插畫，亦會遍布香港站港鐵藝術舞台，包括車站牆壁畫布、柱身上連綿不絕嘅圖案等，等乘客可以置身趣怪繽紛嘅塗鴉世界！

另外，小妹昨日路過金鐘站，發現車站竟然變成迪士尼魔雪奇緣嘅阿德爾親善大使小白同小雪人，真係好cute！原來，港鐵同香港迪士尼樂園合作，昨日中有一架魔雪奇緣世界主題佈置嘅列車，喺迪士尼線啟航！

Kelly Chu