KellyChu - 打拼事業 39歲做爸爸 孫玉菡呼籲早生好過遲｜Executive日記

香港生育率持續低迷，政府為鼓勵生育，向新生嬰兒家庭派兩萬蚊津貼，勞福局局長孫玉菡噚日出席電台節目時就透露自己生仔育兒嘅心得，形容大女出世時，第一次做爸爸好開心，但自己比較遲先有小朋友，遇到不少困難，因此鼓勵年輕人要生就要早啲生！

孫玉菡透露，與太太在讀書時期認識，拍拖多年後結婚時仲好後生，所以仍一心想繼續為事業打拼，自認喜歡小朋友嘅佢，直言差唔多39歲先做爸爸，比同輩遲，別人子女已經讀緊大學，自己子女先讀緊小學，所以鼓勵年輕人要生就早啲生，因為到某個年紀想生嘅時候都唔係即刻得㗎。

孫玉菡憶道，見到囡囡出世時好開心，但到呢個年紀先有小朋友係戰戰兢兢，成個過程好多擔憂，感恩最後阿囡都健康出世，之後有了經驗，生第二個時就容易啲。佢又形容自己係顧家好男人，打兩份工，一份工係局長，另一份工就係爸爸。

雖然工作忙碌，但孫玉菡都會盡量抽時間陪老婆仔女，強調維繫感情係需要見面，一有時間就會同老婆食飯，亦分享育兒心得，指自己唔會將兩個小朋友互相比較，健康快樂成長係最重要，自己小時候好多事情都係自己決定，所以會尊重孩子嘅想法，坦誠溝通，將大家當作朋友。

年輕一代未必個個想結婚生仔，但能夠組織一個屬於自己嘅家庭，Kelly相信係一件幸福嘅事！

Kelly Chu