KellyChu - 鄧炳強拍片帶路沙頭角搵食 大讚熟食中心「3巨頭」｜Executive日記

　　沙頭角第二期開放計劃元旦起已經展開，市民遊客可以參觀中英街以外嘅禁區範圍，一場去到當然要試下地道菜式，保安局局長鄧炳強就拍片向大家分享自己嘅十大心水美食，其中三款喺沙頭角熟食中心，分別係客家鹹菜雞、香煎蠔餅麵同埋陳年金桔蜜。

　　鄧炳強大讚客家鹹菜雞「果然好滑」，鮮嫩雞肉配鹹菜，再食一啖白飯，小妹見到都流晒口水。第二道香煎蠔餅麵，由香口鬆脆嘅蠔餅蓋住一大碟炒麵，局長形容「啲蠔仔大粒到好似蠔豉一樣」，仲問老闆有咩秘訣可以煎到啲蠔餅咁好味，老闆話要慢火煎，唔可以急，局長就搞笑話「香煎何太急」。

　　鄧炳強最後介紹手沖飲品陳年金桔蜜，強調係由老闆自己醃製最少3年而成，「最適合似我聲音沙啞嘅人」，佢仲預告下集將會介紹「七大沙頭角美食之最」。想去沙頭角體驗特色遊，記得留意喇！

KellyChu