KellyChu - 參加者：唔使畀錢 最好搞多幾次 愛心義剪助逾千老友記「飛個靚頭」 | Executive日記

願景基金會及深水埗居民聯會合辦愛心義剪活動，為當區1000位長者及有需要人士，免費提供理髮服務、中醫診療服務，並派發福袋。有參與長者指，相比起去髮型屋，義剪活動更加開心，「可以睇到大家嘅熱心」。

　　由願景基金會主辦及深水埗居民聯會合辦嘅「愛心義剪顯真情2024」，昨喺荔枝角社區服務會堂舉辦，活動規模與過往相約，邀請咗100位義務髮型師、30位中醫師為長者提供服務。

　　現場其中一位參與義剪嘅鄧婆婆話，自己今年係第2次參與，認為活動「非常之好」，最好可以半年搞1次，而場內氣氛亦都不錯，相比起去髮型屋，參與義剪活動更加開心，「可以睇到大家嘅熱心」。

　　另一位伍婆婆則表示，參與義剪唔使畀錢，當然開心，對於長者而言「幾十蚊都好重要」，期望能夠舉辦更多類似活動，亦同樣認為1年1次少咗啲，3個月搞1次會更好。

　　深水埗居民聯會理事長陳偉明話，適逢中元節，希望藉活動宣揚孝道及正能量，讓各位長者接收到義工嘅愛心關懷，祝願長者「剪個靚髮，容光煥發」。

　　願景基金會會長甄韋喬就表示，過去嘅愛心義剪活動服務，受惠人數已超過1萬位，非常感謝各位義工、團體對活動嘅支持，亦感謝各位「老友記」參與活動。

KellyChu