KellyChu - 激戰4回合挫荷蘭勁敵 成亞洲第一人 16歲港青勇奪Pokémon GO世界冠軍 | Executive日記

由日本動畫《寵物小精靈》衍生出嚟嘅遊戲《Pokémon GO》，曾一度掀起「捉精靈」熱潮。最近美國夏威夷檀香山舉行一年一度Pokémon GO世界賽，綽號「蝦皮」嘅16歲香港青年鄭業楷成功殺入決賽，並以局數3比1擊敗荷蘭對手Martijn Versteeg，成為世界冠軍，贏走2萬美元獎金，揚威海外。

　　「蝦皮」雖然年紀輕輕，但其實同小智一樣，已經累積咗多個大賽經驗。佢去年亦曾代表香港到日本參加Pokémon GO世界賽，惟當時隊伍表現未如理想，喺初賽止步。出國參賽所需旅費不菲，「蝦皮」曾透露「冇錢，阿媽唔准去」，好在得到同樣係Pokémon GO愛好者嘅肝病權威專家黎青龍等人贊助出賽。

　　打機看似簡單，不過要打入世界賽並唔容易，選手們先要喺各自地區參加聯賽，獲得足夠積分後才可獲邀參加不同錦標賽，整個賽季表現最好嘅「訓練員」會獲「Pokémon World Championships」邀請出戰世界賽，與其他「訓練員」正面交鋒。

　　今年亞太區只得1個出線名額，由「蝦皮」成功贏得代表資格，再喺決賽一路過關斬將，以局數3比1擊敗荷蘭對手Martijn Versteeg，成為首個香港代表贏得呢項賽事嘅冠軍，亦係首個嚟自亞太區嘅世界冠軍。

　　「蝦皮」賽後多謝喺香港嘅隊友，亦感謝一直以來支持佢嘅人，希望今次大賽可以讓更多人認識遊戲。佢亦坦言能夠贏到冠軍，因在「6選3」賽制上下咗唔少苦工，感恩過程中結交到五湖四海嘅朋友。

KellyChu