玄學指點迷津之法 2

玄學有所謂玄之又玄, 眾妙之門ｏ

玄者, 難解之謂也, 所以凡是預測, 智者必冇明言咁笨, 江湖上, 有所謂: 天機𣎴可洩漏ｏ而且直言必遭天譴（唔中, 冇人BUY,  惨過天譴！） 但唔講人又點知你有料呢？唯有只講大方向, 只是畫龍, 但由得各人自已去點睛, 咁就事後大把空間去解說了ｏ

例如推背圖, 一張美人射日, 就清楚點出第二次世界大戰, 美國佬會用原子彈去炸日本ｏ但古人又點知有亞美利加呢個國家呢？其實一個女子, 可解作陰柔之法又得,解作女權又得,  射箭又可解作用運動去解決, 例如五四運動諸如此類, 事後解來, 就可以準到不得了ｏ至於個女公仔係咪美人？見仁見智啦！

又例如推背圖有讖云: 黄牛山下一個洞, 可容十万八千眾, 先到之人得安穩, 後到之人半路送！有人話, 仲唔係講香港這個東方之珠？先逃難而至的人, 生活得好地地, 仲唔係得安穩？ 而家才來的人, 就咪只得自由行囉！仲唔係半路送？

推背圖推算過去歷史之事準到無倫！一來圖象大把想象空間, 二來有料的玄學家（如黄SIR之流ｏ）多屬飽學之士, 死都可以拗番生！事後解來自是頭頭是道也ｏ你叫佢地去預測未來, 佢地就只能大吹法螺吧了！

凡到年尾, 例牌有許多玄學家（留意當中好多江湖佬揾食也！） 作出總總預言, 講吓乜顏色旺, 乜嘢生肖犯太歲, 拜吓神, 祈吓福, 對來年展望, 小心健康呀, 小心經濟呀, 慎言慎行呀, 叫人小心小人呀（仲可以打小人, 出吓氣添！）都算有益世道人心, 此乃中國人五千年之智慧也！

做人有時都要隨吓俗, 人地拜神, 黃SIR咪食吓燒肉囉ｏ

至於要黄SIR指點迷津, 靚女就摸骨啦！