科技懷舊篇 4

六十年代只有香港大學有電機工程讀, 當年安培泛達請了七個初級工程師, 六個來自港大, 只有黄SIR來自中大, 而且不是讀工程的, 只是副修電子, 得幾招三腳猫功夫, 居然冇被人發覺, 反而半生可藉電子工程謀生, 亦一奇逢也！

當年港大電機工程系又分為重電（HEAVY CURRENT）同輕電（LIGHT CURRENT）, 重電是指發電機呀, 摩打呀, 重型電機器械呀, 而輕電就是電子工程了, 理工學院當年只得高級文憑課程, 也是咁分法！

但中大當年係冇工程學系, 只叫做電子系, 不能叫做電子工程系！所以黃SIR又唔係正式電子畢業, 又冇受工程師訓練, 能在此業界立足半生, 亦足以自豪也！

但雖然冇正式在電子系畢業, 但黃SIR卻在工廠做了两年, 再走回中大做了年半電子系助教！所以中大第一屆電子系畢業的同學, 黄SIR卻有教過！

黃SIR本來想在中大電子系讀番個碩士及博士學位, 因為做咗两年廠, 適逢股市大升, 黄SIR計計身家, 都有九万幾ｏ（當年黄SIR在大埔租一層樓讀書, 月租三百六十元吧了, 買一層只三万餘而己！）如果當年識得賣股票買樓,可以買倒三層大埔五百零尺的樓 根本發鬼咗！書都唔駛讀！

奉勸年青人ｏ識得理財同投資才是做人一大成功因素也ｏ可惜黄sir在五十歲前也是渾渾噩噩吧了！

結果七三股市大冧, 眼見財富化水, 又有朋友招手返廠幫手, 黄sir唯有放棄偉大的上進計劃矣！