肺腑之言 6

黄sir周不時收倒D不明來歷的電話, 有時D肺話, 吹到你漲！

有一次有位姐姐仔打電話同我講, 我係乜乜信貸, 想要知道閣下需唔需要借錢？吓？咁都得？有錢冇人借？有冇搞錯呀？駛唔駛還先？吓？

最妙有次有條靚仔打電話嚟話, 要幫我計畫吓我D財政！（唉！靚仔, 黄SIR食鹽多過你食米！行橋多過你行路！借歪啦你！）

有時失驚無神, 有個電話問, 唔知你贊唔贊成香港設立賭塲呢？（嘩,乜咁嘅調查都有人做嫁？香港想開賭場咩？贊成又可以開咩？無聊咗D噃！）

有時又會無啦啦！接倒D  X原,  X联 嘅電話, 話有個客想出, 幾多幾多百万買你個單位！（大佬！你知我想賣咩？）

D友真係煩到你唔信！咁都做倒生意？我就唔係幾信矣！（偏僱又有人信！有人做！煩死人！）

有時D人做嘢, 都冇理有冇效果, 以為佢自己有小小機會都要試吓, 誰不知, D客認為你間公司蠢得滯, 有生意都唔會益你啦！

有間嘢修理FAX機公司, 成日 FAX  D廣告入泥ｏ 叫我如果FAX機壞咗揾佢！唉！亞哥, 壞佐就收唔倒你張廣告啦！嘥晒我D紙！吹漲！（可能佢以為我會 KEEP 住, 將來揾佢！其實我都嬲到震！第一時間垃圾桶見！）

咁做生意！吹到漲！正肺話！