錦田村屋

有個朋友佢租左錦田村屋一住就五年，佢住開個村屋係700呎，三樓連天台(內置樓梯)，業主多年前以$4,200連車位租給他，之後一直冇加租。最近，業 主想將物業出售(開價170萬)，所以通知我朋友要搬出。但呢個業主都算好人，佢冇迫佢走，只係叫佢有時間就去睇下樓，過左年先搬都可以。



有 日，同朋友去左佢附近既地產睇下有咩租盤，佢既要求係700呎，三房，最好有天台，Budget 5K。去到一間地產問，Agent透露近日好多村屋業主都趁好價，迫走租客而轉售物業。所以近日好多租客黎搵租盤，租盤極小。呢個Agent 只係安排左一個租盤比我地睇，又細、好舊、天台係外置樓梯，而且又唔包車位，入村條路要多半年先整好，依家係單線雙程行車，避車位又小，開價5.5K。

再去睇另一個Agent，佢都講差唔多同一番說話，又帶左我地去睇一個租盤，開價都係5.5K。呢個盤在錦上路邊，出入方便，不過近馬路邊比較嘈，屋內又暗，房細，朋友都不感興趣。

如果想租到佢心目中既盤，Agent話最少都要6-7K，不過依家都冇咩盤可以選擇。朋友很迷茫，越看越覺得他現時住處無論各方面都很想理，特別是租金更是極其底。於是就突然引發起購買村屋自住的念頭。

由 於佢早幾個月在大陸買左層樓，所以依家首期資金都緊緊地，但供款是沒有問題的，佢開始為籌集首期而煩惱。首期只係一連串大問題既開始，購買村屋要注意既野 好多，咩丁權、土地合法使用權.......泊車位、村民友唔友善，一大堆問號即時彈出黎。知道有問既地方都好D，最慘係唔知佢係問題既問題先難攪。而我 呢方面既認識係零，實在比唔到咩意見佢。只可以幫佢搵銀行估價，問下佢地做唔做按揭、可以做到幾多成按揭。

咁都好，呢個村屋經驗令我有機會去了解多一樣野。