我要當官,因為..

早陣子同太太既朋友一齊燒野食，佢朋友以前係在大陸做廠。話說某日有個年青員工黎同佢辭職，朋友問佢原因，佢話要返鄉下，鄉下政府有個位請左佢，月薪伍百 大圓。朋友覺得好奇怪，佢現時既工資都有千幾蚊個，又包食包住，點解要返鄉下做個月薪底咁多既工呢? 員工就答 : "我的志願是當官，因為當官就可以貪污! 之後我地成家都會有好日子過!"。我朋友聽到之後真係O晒咀。



果 位員工既志願真係冇得頂!  都唔知佢喺邊度學埋D咁既歪理，如果二三十年前聽佢咁講都可以理解，但係今時今日真係咁易貪到污咩?  依家資訊發達，做官都唔係惡晒，有好多野都收唔埋，好易比人擺上網之後就通晒天。依家在國內貪污既難度，一定比幾年前高。況且，我好相信中央政府會慢慢改 善貪污情況。 就算真係可以貪到，我都唔相信佢會一係個出色既貪官，頂多貪一排就比人推出黎做替死鬼。單單由佢將佢既畢生志願同人分享，攪到人人都知佢做官既目的，已經 知佢唔係一個當貪官既好材料。

一個立志去貪既官，一定唔會係好官，影響社會又影響人民!  我真係希望佢快D比人拉，唔駛阻住祖國既文明發展!