準備迎虎年

貶吓眼仲有十三日就到年初一了！黄sir一於玩少d, 叠埋心水迎虎年！平安是福也！

已往過年好多嘢做, 要由內至外買過晒D新嘢, 又一定要飛髮ｏ舊時通常年尾飛髮佬可以收雙工, 因為人人要飛髮攞意頭, 唔慳得也ｏ 細路仔最鍾意飛髮, 因為有公仔書睇ｏ 又一定要買鞋, 因為正月唔准買鞋, 鞋鞋声, 唔吉利喎ｏ

辨年貨, 糖果瓜子, 髮菜両士, 鮑魚海味, 都一早入定貨ｏ 因為過年大都在家团年及開年, 一家人食餐飯ｏ 小朋友逗利市, 賭吓錢, 非常好玩ｏ

年三十晚, 半夜有人派財神上門, 又係逗封利是揾錢時間ｏ以前細個未識字都學人寫, 財字寫咗唔知乜字ｏ（可能係 才貝 掉轉咗ｏ） D大嬸收到, 啋到你暈, 惡向胆边生, 番去寫個 衰神 派俾佢, 等佢衰足一年, 正是黄sir頑童創意本色ｏ

過年又多嘢食, D角仔十分鬆化, 酥皮, 內有花生沙糖, 真係好食過而家D好多ｏ煎堆通常好大個, 硬到死, 冇人鍾意食, 留番泥煲甜粥, 一樣冇人食ｏ最好味反而係团年開年食剩D餸尾, 全部擺在一起, 整個一品煲, 加d生菜, 真係好好味ｏ通常夾倒舊鷄, 或者舊蝦碌, 真係開心到飛起ｏ

年糕, 蘿白榚不在話下, 仲有隻竽頭糕都正, 一年中食物最充足就係過年了ｏ有得食, 有錢駛, 有錢賭, 有得玩, 夫復何求？

吓, 諗諗吓, 同我而家有乜唔同呢？（哦, 果陣我係細路, 而家我係大人了（四十後矣！）ｏ）