一年容易又中秋 2

以前的日子（五六十年代）, 唔係餐餐大魚大肉, 要過節（如春節, 瑞午, 中秋, 之類）才會有魚有肉食, 有靚湯飲ｏ

黄sir細時過節, 通常會有鮑片食, 係麥西哥果隻車輪鮑 （而家賣到五六百文一罐, 一不留神就買到假貨, 剩係得張招紙係真, 真慘ｏ） 有次有個朋友係街邊買, 百幾文一罐, 隻辨乃正宗車輪鮑也, 香噴噴！人人爭住買（D媒嚟）, 返到屋企一開（一定冇人係現塲開嘅）吓？乜係菠籮？（都算有D幽默感, 起碼都似車輪也ｏ）ｏ

車輪鮑用𧐢油簡簡單單整吓, 已經十分好味, 當然要用生菜做底啦ｏ

過節仲一定有茄汁大蝦碌, 黄sir唔食頭, 專食中間部份和蝦尾, D壳都好好味, 落手揸住食, 好有快感也ｏ

大𠜎鷄（真係好大隻, 成三四斤重都有）用湯淥熟斬件就食得ｏ鷄脾通常成隻食,分倒一隻就快活過神仙了ｏ 通常靚仔乖就有, （我梗有啦！）有時煲牛白腩蓮耦湯, 好似有加D髮菜, 𧐢士, 十分和味ｏ D牛白腩點D 余均益果隻辣醬, 就至正ｏ（我而家都係只食呢隻辣醬嫁ｏ）

有時屋企會煲豬肉湯（個陣人人識唱, 眼光光, 飲咗豬肉湯！）黄sir最鍾意就食D淋嘅半肥瘦豬肉, 點D生抽已好好食ｏ至於有粉腸仲正, 點D醬在口中嚼, 很有咬頭ｏ有D再窮D的小朋友教我, （黄sir未試過！太核突！） 用條線綁住條粉腸, 嚼完想吞, 就拉番出泥, 點醬再食, 可以食好耐也ｏ﹝吞咗就冇囉！﹞

近年黄sir都好少, 一大棚人食呢種家庭式的做節餸菜了ｏ

唉！去酒樓, 又點食倒正嘢吖！