扭六壬 7

話說蘇秦先生聯合了六國, 但依然有一個秦國是對手, 點先可以立於不敗之地呢？於是蘇秦先生又要大扭其六壬了！

（到此大家應該知道, 扭六壬者, 不外乎是用智慧去解决複雜世事而已！切迷信六壬神法也！）

當時與蘇秦同學於鬼谷子之張儀先生正落難, 衰衰咁去求助於蘇秦ｏ（此時蘇秦已做了六國大封相！）

點知蘇秦呢條衰仔, 連門口都唔俾佢入, 反面無情, 仲叫佢走, 氣到張儀先生差D嘔血, 唯有死死氣返回賓館ｏ（相信都係重慶大厦印巴人仕住果D九流貨色！此時張儀窮到燶也！）

正當張儀愁冇水返歸, 唔知點算之際, 忽然有一名生意佬出現, 同張儀講: 你都冇路行了, 不如去遊說秦國啦ｏ 我打本撐你！

張儀見有人打本俾佢搏多次, 死人都應承啦ｏ（絕處逢生, 咁喬？有冇DD懷疑呢？）

於是張儀同生意佬夾計, 去秦國揾老襯ｏ（一個有錢, 一個有計）自不然成功啦ｏ 於是張儀又扭盡六壬做了秦國的丞相！（還記得佢同蘇秦出自同一師門者也！）

張儀正想同拍檔（該生意佬！）共享富貴ｏ

點知拍檔自爆: 其實我係蘇秦先生, 派泥幫你取秦國相位之人ｏ 蘇先生話: 而家七國（即當時的全世界！）我两師兄弟玩晒, 你知點玩啦ｏ（可見蘇秦心計智慧之高！）ｏ

自己友做對頭人, 互拉猫尾可也！

張儀先生講咗下面一番令黄sir印象深刻的話:

吾於蘇子術中而不自覺, 吾不如蘇子遠矣！

（意思即係話, 我在蘇秦設計的局中都唔知, 仲以為自己好命, 我真的不及我的同學蘇秦了ｏ）

可見就算同是懂得鬼谷子所傳的扭六壬之法, 但運用之妙, 只存乎一心吧了！明冇？