語貴吉祥

所謂一言興邦, 一言喪邦, 言語的重要, 不在黃SIR細表ｏ

以往過年的的日子, 只准講吉祥的說話, 不准亂咁噏, 噏錯咗,  家中D老工人,就大大声講 醜嘅唔靈, 好嘅靈, 吐口水講過！有時會快得滯, 講咗好嘅唔靈, 醜嘅靈, 十分搞笑ｏ

正如在呆佬拜寿一劇, 阿福在過年, 就會同老爺講, 老爺今年要晤要番亞福呀？咁…. 福, 梗係冇理由唔要嫁, 於是阿福又可以保住自已個飯碗多一年嘞ｏ

阿福跟手再問老爺, 係唔係要洗乾淨個尿壺….冲番壼茶呀？

老爺於是就飲倒D ”壓壓地” 嘅茶嘞ｏ（呢個就係亞福嘅古惑招嘞, 整D尿壼茶俾老爺飲, 都吹佢唔漲ｏ）

以前拜年逗利是, 興摸上手係軟嘢才正, 如果硬嘢, 即斗零一毫, 個心自然唔舒服ｏ見個亞毛都成六七十勾, 睇死佢都生唔出嘞, 就大大声, 恭喜亞毛, 添丁發財！連生貴子！吹到佢漲！

或者先始声明: 恭喜發財, 利是逗來, 斗零唔愛, 十文袋落袋！

有時D大人好古惑, 封美金一元（果陣值五元）, 仲要去銀行換番港紙至用得ｏ

以前亞視老細, 邱得跟仲絕, 封五元佢自己果間銀行嘅禮券, 玩殘D員工, 員工要開個戶口至兌倒錢！

所以好多員工恭祝佢 冚家……富貴！

就嚟又過年嘞, 謹祝大家万事勝意, 新春大吉, 年年有餘, 滿堂告慶, 龍馬精神,東成西就, 網網千斤……

（幫手諗吓啦, 而家D揮春, 有乜新嘅吉祥用語呀？）