片酬級級跳 億三買獨立屋
2013/03/08 09:43:44
網誌分類:
生活
| 「宇宙最強」甄子丹除咗功夫勁，投資仲醒。近年片約不斷、片酬好似火箭咁飆嘅甄子丹，近年密密買「磚頭」，估計手頭物業市值近二億元，佢最近又斥資一億三千五百萬元，購入摩星嶺道御海園C號屋，唔知佢會唔會喺間獨立屋度闢間練功房，放個「木人樁」練吓拳呢？ 早排「宇宙最強」被冼國林爆片酬升至四千萬元，豬籠入水嘅佢，投資有道，佢同老婆汪詩詩名下嘅物業，遍佈香港、國內以至美加，有指市值近二億元，全部有賺無蝕。身家豐厚嘅佢，自然要買間獨立屋先襯得起佢身份。 老婆投資話事「公二婆八」 據Kelly所知，佢喺上月二十六日，同老婆聯名買入薄扶林摩星嶺道66號御海園C號屋，單位實用面積三千三百多方呎，作價一億三千五百萬元，實用呎價達四萬元。 物業坐擁西博寮海峽全景，除普通分層單位外，有四幢連私家泳池洋房，全部大廳及房間都裝設落地玻璃窗，沒有任何窗台位，非常好住。原業主○七年以六千八百萬元購入該物業，持貨六年，物業升值九成八。睇番土地註冊處資料，甄子丹佔該洋房業權兩成，汪詩詩則佔八成，認真錫老婆。 堪稱影壇吸金王嘅甄子丹自認怕老婆，話全副身家都交由老婆打理，不論物業、現金同投資，都係老婆話事，所以話呢，「怕老婆會發達」呢句說話，又多一個活生生例子。 KellyChu |
 | |
| |
 | |
回應
(0)
我要發表