缸瓦太子反客為主
2013/03/21 08:45:48 網誌分類: 經濟
早年，潘家設門市，與幾家食肆來往，長期供應碗碟匙皿，生意穩定。惟太平山下，寸金尺土，舖租昂貴，遂結束門市，改租貨倉。
歲月不饒人，潘父退休，家族生意交太子潘，他克紹箕裘，敬業樂業，串連熟客，尤與K酒家最熟落。K酒家太子爺B哥，年紀與太子潘差不多，富二代志趣相投，閒來唱K、手談、品酒。
且說股市如火如荼，夠膽入市，多有斬獲。太子潘見獵心喜，入市炒埋一份，玩孖展重錘炒隻內房股。月有陰晴圓缺，股市有上有落。未知是否睇錯市或跟錯風，此內房股急落，斬孖展斬唔切，要抬成百萬補倉。
潘氏家族生意乃有限公司，太子潘自己炒股票，不能用公家錢填數，而個人資金大部份擺晒入股市，剩三幾十萬。思及與K酒家每年有幾百萬生意來往，太子爺B哥與自己稱兄道弟，遂向他開口，以銀行息口，商借50萬，以濟燃眉之急。平時B哥擺老闆款，爭住埋單，今次太子潘有難求助，佢借咗聾耳陳隻耳。
補倉限期前一日，太子潘往另一家有多年交情酒家收貨款。酒家老闆三叔與潘父有交情，見太子潘愁眉不展，太子潘實情相告。三叔見世侄有難，義不容辭，問清楚補倉銀碼，全數免息借予他應急，只立下一年期還款借據便行。
太子潘獲援助，翌日搞掂補倉，往附近茶餐廳歇腳，見茶餐廳用發泡膠餐盒載外賣，想起昨日見三叔之酒家外賣部也用發泡膠餐盒載外賣，靈光一閃，一式「反客為主」財技現腦海。
當局鼓吹環保，環保團體對發泡膠及塑膠食物餐盒口誅筆伐。太子潘有見及此，反客為主，主動把形勢扭轉過來。
茅塞頓開錫紙保溫
他向三叔建議，把發泡膠外賣餐盒改回昔日之卡紙外賣餐盒，但內籠須加上保鮮保溫設備，既環保又實用，餐盒外表可印上酒家宣傳。三叔乃投資與他合作，生產環保外賣餐盒。但卡紙外賣餐盒內籠用甚麼材料保鮮保溫？太子潘逛超市觀察，見有燒烤用錫紙，茅塞頓開，以錫紙為餐盒內籠箔膜，設計生產，申請專利權。此卡紙保鮮保溫外賣餐盒受歡迎，不只三叔酒家專用，其他食肆亦訂購，太子潘豬籠入水，至專利權屆滿，已夠享夠長。
錢樹良
回應 (0)
我要發表