另有角度！

紅背心保安等失業

工潮結束，邊個最傷心？工友一致投票揀紅背心保安（圖）。罷工之後，碼頭高薪請咗大量臨時保安，位位80蚊一粒鐘，人工直逼機手，平日忙於𥄫實班工人，有次班工人夜麻麻返停車場拉筋做體操，班保安淨係識望住班工友O嘴。
到噚日工潮去到尾聲，呢批臨時保安唔知係咪心情忐忑擔心冇得撈，索性肆無忌憚圍埋玩手機。不過喺碼頭做長工嘅保安就唔同喇，因為今次加薪9.8％，佢哋都有份受惠，呢兩日唔少人仲靜靜雞出嚟多謝班工友，可謂人間有情。

孖仔Cut保險贏啖氣

碼頭中人，個個都認得孖仔（圖左及中）機手，兩兄弟喺碼頭由朝捱到晚，29歲仔仲係單身，成日講笑話最大願望係識番個大學生女友，估唔到罷工之後幾乎日日都有學生妹嚟搵佢哋傾偈，4.26上完禮賓府之後，佢哋仲同何偉航（圖右）上台唱Beyond嘅歌。
細孖話，今次工運係佢人生轉捩點，之後會讀番書，希望兩年後可以考警察重新嚟過，佢話因為罷工期間收入大減，cut晒五份保險同一份基金，噚日仲連架車都賣埋，好彩識咗一班學界朋友仔，友情無價。

碼頭王子擁護者眾

今次工潮，除咗揭露咗碼頭辛酸，仲打破咗好多巿民對碼頭工嘅迷思，原來呢行唔止後生仔多，好多仲青靚白淨，有轉行去演藝界嘅潛質。其中最突出嘅喺高寶塔機手郭柏佳（圖），斯文高大嘅佢經常代表工人答記者問題，講嘢有文有路，老老嫩嫩嘅工友都好擁護佢，稱呼佢做碼頭王子，有記者就私底下叫佢做碼頭黎明。
聽講阿佳一家三口都係機手，今次齊心罷工，佢已經決定咗唔會做番呢行，因為食飯同去廁所問題都未解決，對外判商又已經冇晒信心。

李八方

黄sir 按: 此文從網上找來, 此事告訴我們：

另有角度！