篤數
2013/07/02 08:41:29
網誌分類:
生活
西九傳超支，老友精神一振，笑咪咪，「經費二百一十六億，你知條數點計？」當然不知，老友就應該知。「計吓日後賣地有幾多錢，經費咪就幾多錢囉！」「你講笑吓嘛？」「呃你做乜？咁大個計劃，點計數？」
咁「兒戲」？用公帑喎？即時笑彎腰。還以為逐條數計，設施幾多、建築成本幾多、營運幾多、通脹幾多，每條計好，加埋一盤大數。原來調轉，原來先估計賣地收入，再拆出各條細數，似模似樣，就送去立法會。
信不信，當然由你，但當年立法會審議撥款，議員的確不斷問，二百億點夠使，問極都有懷疑，原來係睇餸食飯。邊個度嘅橋？老友話係乜乜乜，sawwww！但點解前政務司司長唐英年話一定夠，拍心口，一筆過唔再攞錢？
馬逢國最近一語道破，「西九原意，是用塊地搞文化區」，賣地收入給西九用，理所當然。之所以，一話超支，林鄭月娥就將地積比率提高一成，樓面起多啲，面積賣多啲，咪有錢囉！
這叫「彈弓手」，地積比率隨需要而增加，無論西九超支幾多，都可以賣樓冚數，反正塊地夠大，自動對沖。而且城規會通過就得，不必問行政會議，不必過立法會。所謂「一筆過撥款，其餘賣地收入撥歸政府」，也是語言偽術。
西九開支大，主因在誇言要國際級。但老外猛人挑來的一篤屎和蓮花，還不如海港城公關選的黃鴨仔，足證藝術，不一定要鬥錢多。相比伊利沙伯醫院之殘舊，舊區小學之破落，支持西九的議員，點向市民交代，錢係用得其所？
盧愛玲
回應
(0)
我要發表