KC: 出得嚟行，遲早要還！

功夫茶

樹欲靜而風不止，佔領鬧劇搞到香港七國咁亂，本來諗住清場之後，聖誕佳節可以過番幾日安樂日子啦，點知「鳩嗚團」陰魂不息，到處騷擾，導致商戶生意受阻，街坊不勝其煩，警方疲於奔命，呢個聖誕烽煙四起，想快樂都幾難。

即係咁，佔領鬧劇雖然已經收皮，但有人不甘失敗，以各種名目糾眾滋事，「鳩嗚」、「跌錢」、「報佳音」，五花八門，無奇不有。

尋日凌晨之嘛，大批示威者喺通菜街同警方對峙，期間有人衝入一幢大廈，拍打住客鐵閘聲稱「借廁所」，有住客要報警求助。

結果示威者同警方角力超過八個鐘，搞到凌晨四點至鳴金收兵。唔使問阿貴，又有多人被捕，何必呢！

真係諗極都唔明，示威還示威，爭取民主還爭取民主，點解要搞到香港永無寧日呢？

點解要半夜三更擅闖民居擾人清夢呢？

試諗吓，如果掉番轉頭，有人騷擾呢班示威者嘅屋企，佢哋又會有乜嘢反應呢？

有人就講得啱嘞，示威者借「鳩嗚」或「報佳音」之名，行流動佔領之實，司馬昭之心路人皆見，警方用文明方法請唔走示威者，咪惟有動用適當武力囉。

所以話啫，示威人士神憎鬼厭，所到之處商戶拉閘、行人兜路、街坊鬧爆，警方唔驅趕，唔通畀佢哋為所欲為咩？咁仲成世界嘅？

最離譜嘅係，有位所謂副教授居然惡人先告狀，聲稱示威者只係喺街上短暫逗留、打開黃傘，呢啲都係合法行為，警方以暴力驅散市民，令佢覺得唔開心，將會去信警務處處長曾偉雄，要求對方解釋警方施暴嘅原因喎。

咁就奇嘞，身為學者，唔譴責違法者，反而譴責執法者，呢啲到底係咩邏輯？

咁又難怪嘅，今日香港是非顛倒，黑白混淆，愈來愈多呢類匪夷所思嘅歪論。好似佔中搞手咁吖，身為大學副教授，自己知法犯法就算喇，仲公然教唆學生違法，而且恐嚇隨時會有暴動，簡直係誤人子弟。

加上反中亂港傳媒同反對派政棍煽風點火，推波助瀾，唯恐天下不亂，青少年紛紛被洗腦，有乜法子唔愈來愈偏激，愈來愈暴戾吖。

都係古人講得啱︰禁而不止，則刑罰侮。

佔中搞手及幕後黑手固然要嚴辦，鳩嗚兵團一樣唔可以姑息。

嗱，咪以為一哄而上就法不責眾呀，隨時自毀前程㗎。

一句講晒，天網恢恢，疏而不漏，出嚟行，遲早要還吖！

KC: 出得嚟行，遲早要還！