木水火
木水火
木水火

公費遊埠議員舔到盡

2015/02/08 12:30:12 網誌分類: 詐、騙、貪
08 Feb

 政壇:公費遊埠議員舔到盡  {#icono0_17}

設計圖片及對白

 

立法會議員不時有考察團,本地、外埠都有,不過,議員對出外同本地遊嘅態度就天差地別,好似民政事務委員會原訂喺本月十日安排本地一個參觀活動,但議員反應麻麻,少於三人報名,最後被迫取消。另一邊又有個下月初嘅德國外訪機會,啲議員就反應踴躍,由於好多議員都出埠,更搞到立法會要改開會時間來遷就,睇嚟坐飛機真係馨香啲!

 焗推遲開會遷就

早前德國政府透過駐港總領事館發信邀請立法會議員到當地訪問,喺下月一日至六日期間去柏林及一個聯邦州訪問,了解當地嘅選舉制度及兩院制立法機關嘅職能。由於德國全數負責今次旅費及住宿、交通、膳食等費用,議員只需要負責雜費開支,所以吸引好多人報名。最終劉慧卿、李卓人、陳克勤、謝偉俊、梁繼昌、郭榮鏗、葉建源、鄧家彪及鍾國斌成功出線,成為今次外訪團嘅成員。

雖然有參與過外訪嘅議員話外訪行程編排匆忙,並唔係大家想像中咁可以周圍去玩,但外訪對議員仍有相當嘅吸引力,尤其目的地係歐洲國家,過去有議員就早去晚返,玩多幾日,今次又點?即管睇吓囉。值得注意嘅係,除咗克勤之外,其餘都係人事編制小組委員會委員,其中梁繼昌更擔任主席一職。由於行程其中一日撞正周三大會,喺大部分委員都去咗外訪嘅情況下,惟有順延至三月十一日先至開會。去年九月,立法會先去完芬蘭、丹麥及挪威訪問,部分人同今次去德國嘅更重複添,可見議員幾咁愛公費遊埠。

相比之下,民政事務委員會原訂喺本月十日,安排委員參觀香港文化博物館及香港歷史博物館就可憐囉,只要有三位或以上議員報名就成團,最後連呢條咁低嘅門檻都做唔到,終要取消。班議員又經常批評本地文娛康樂設施使用率低,依家機會實地考察,但又冇人願去,究竟啲議員係為工作?定係玩呢?

 

     政壇:公費遊埠議員舔到盡

    http://the-sun.on.cc/cnt/news/20150208/00408_001.html

 

回應 (0)
我要發表
user