[8月3日]散戶輸錢的必勝心法

Hello，我又回來，對上一次係5月13日，3個月左右恆指已經到左244XX左右跌得真係快..其實自5月之後一路都係短炒買對沖過日子。

眼見好多人都輸到喊的7月頭，但卻係賺錢最多最易的一星期，之後就好難了。

其實係整個2015年發展，由高到低都不過4個月之間，4個月之間股民就有一個180度轉變的財富轉移，我想講講一個見到的輸錢心態，包括我自己都要警剔一下。

1. 止蝕  － 我諗呢個大家都明白的，但問題係應該咩時間做？
   我會用3部曲黎形容：
   
   第1部 當股價跌穿買入價，並再跌落去，係呢一刻一般都會比藉口自己無買錯，買得岩之類既說話，其實一般輸多過8%就唔理之後升定跌都態該走頭，當然一般都會堅持繼續持貨......
   
   第2部 股價再大幅下瀉，並同買入價有15%至20% 或更多既距離，係呢刻散戶終於都投降，佢會講出升返上去就走左之類既說話，無錯，係升返上去，但實際有冇咁筍，惡夢岩岩先開始，去到呢時候股價多數會跌穿心理關口，例如乜乜目標價，幾多蚊既整數之類，因為已經比大戶操控了你的心理。
   
   第3部 勁嚇人壞消息出爐，大市即時跌入恐慌階段，係呢刻散戶終於都知道要走人啦，佢會開始擔心自己會輸晒本金之類既諗法，有部份散戶會坐功好有力，但有部份會止蝕投降，去到呢一刻係咪真係見底反彈？呢一點有討論空間，要睇大環境係咪真係好，呢篇暫時唔討論，因為見底係要睇多項因素。
   
   總結 ： 好多時候，99％散戶並唔知自已買既股票究竟價值如何，呢點是肯定的，所以簡單D講，你入場同賭錢無分別，就應該用賭錢心態去處理。
2. 博反彈 － 呢一PART 無幾多部曲，就係散戶係無把握既情況下好鍾意入市博反彈，例如：RSI見超賣、跌左咁多入市博少少、到XX天線會彈、MACD 拗腰喎。 又係個句，係一D只願接受既訊息下，只見到岩自己睇既野，個人會特別興起。最後點？可能有一半成功一半坐艇。
3. 明知山有虎偏向虎山行 － 有D儲左好多積蓄既新手／小散戶，佢地見到好低既時候佢地話呢個位開始投資，其實情況同1,2有相似，不過係一個惡劣形勢既環境進行，多數都係睇得巴菲特多變左巴菲特價值投資，最後，我就唔講了.....
4. 貪平 － 散戶點解會成為弱者？當然錢唔夠多係因素，但更重要係心態，好多時，散戶好鍾意貪平買D 價錢平，佢可以買多D既股票，博佢一升可以賺多多即走，情況類似細價股，但有好多散戶亦套用係大股度，所以散戶好喜歡痴係弱勢股度，點解成日聽到個隻升到坐火箭，自己個隻郁都唔郁，因為絕大部份都買錯股，損失了時間。