保留部份遺體作科研佳佳紀念專區市民悼念送鮮花

2016/11/03 08:41:14 網誌分類: 生活

03 Nov

        陪伴港人十七個寒暑嘅大熊貓佳佳，上個月健康急劇惡化與世長辭，Kelly同廣大市民都好唔開心。海洋公園為咗悼念佳佳精采嘅一生，設立咗個紀念專區分享佢生前點滴，畀市民向佳佳寫悼詞同送上鮮花。至於佳佳嘅遺體，公園會保存一部份做科研、獸醫學教育同保育用途，令佳佳嘅精神傳承落去。

        海洋公園動物及教育部執行總監蔣素珊（Suzanne）話，為悼念佳佳精采嘅一生，喺香港賽馬會四川奇珍館外設立咗個紀念專區，市民可以喺悼念冊寫下悼詞同送上鮮花，表達自己對佳佳的心意。Suzanne大讚佳佳以動物大使身份，肩負公園保育同教育嘅使命，喺啟發同教育公眾有關大熊貓保育方面，擔當咗一個不可或缺嘅角色，所以好多謝佳佳咁話。

        海洋公園、特區政府同臥龍中國保護大熊貓研究中心（卧龍）仲一齊決定保存佳佳嘅部份遺體，用嚟做組織病理學、獸醫學教育同研究用途，而佳佳嘅皮毛就會保存嚟畀將來嘅新生大熊貓寶寶育幼時使用。Kelly覺得呢個處理安排真係好好，就好似畀佳佳嘅精神傳承落去咁！

        KellyChu